Han kan oppfylle draumen allereie i september når det er finalerunde i NM i Strongman, men Kvernberg har ikkje hastverk.
– Eg sette eg meg som mål å bli Norges sterkaste i løpet av ti år. Men for oss i Norge er dette berre ein hobby, og då trengst det tid.
Denne helga kan han ta neste steget mot målet. Då er det klart for andre runde i Norges Strongman Cup 2017, i Nordreisa i Troms.
Der skal Kvernberg velte dekk, løftar steinar og trekker lastebilar – for å nemne nokon av øvingane. Han er klar for ei fysisk krevjande helg.
– Kroppen følast grei og er skadefri. Eg skal ete godt, kvile og få hovudet på plass for å prestere mitt beste, seier han.
Må trene smart
Han er allereie i noregstoppen, men må bygge stein for stein for stein for å bli den aller beste. Kvernberg seier det er viktig å gi seg sjølv tid til å bygge opp nødvendig styrke, kunnskap og erfaring.
– Det handlar om å trene smart. Når du kjenner smerter i ledd og musklar må du gi deg før det er for seint. Ta nokre frikveldar for å bli bra igjen.
Målet er hårete og marginane er små. Kvernberg er på ingen måte garantert plass i årets finale. Men han skal til dit og han skal bli best, til slutt.
– Ein ser at det er små detaljar og kort veg til toppen. Det handlar om å finpusse forma og stå på, så vil strevet betale seg.
Planen er å klatre ein plass oppover for kvart år. Med ein 6.-plass i fjor, betyr det at han når målet i 2021.
Likevel innrømmer han at det hadde vore heilt greitt om han berre kunne vinne heile greia i år.
Utfordrande
Når han ikkje trenar er Kvernberg offshore som oljearbeidar, og har vore på jobb i nesten alle verdsdelar. Alle reisene kan vere ei utfordring når han trenar for å bli best.
– Eg må vere dobbelt så flink når eg først er heime, for eg mister jo omtrent seks månadar med trening kvart år.
Det er ikkje nok fysisk arbeid offshore til at det bidrar til treninga.
– Reglane for HMS er strenge, så det meste eg har lov å løfte i jobben er 25 kg. Men når eg er ferdig med skiftet kan eg godt gå i treningsrommet og ta 300 kg i markløft.