37 storfe og ein hest er no berga ut frå andre etasje og er utanfor fare.
– Naudetatane jobbar med å sikre området. Vi forsøker å få tak i ei gravemaskin for å byggje ein demning på nedsida av fjøsen, opplyser Arnfinn Klausen ved 110- sentralen i Møre og Romsdal.
Bygninga står i fare for å kollapse når som helst. Eine veggen bular kraftig utover. Ein frykta lenge at spaltegolvet som dyra sto på skulle rase ned i gjødselkjellaren.
– Mattilsynet er kontakta og vi arbeider i samråd med dei for å finne ein eigna plass å flytte dyra til, seier Klausen
Gjødselkjellaren skal vere relativt full, så det kan føre til ein stor lekkasje om veggen rasar.
Politi, brannvesen og kommune jobbar med å sikre fjøsen, som skal stå i fare for å rase saman.
Politiet fekk melding like før klokka halv fire i ettermiddag om lekkasje frå ein gjødselkjellar og at det kan vere fare for at bygget vil kollapse.
Operasjonssentralen til Møre og Romdal politidistrikt opplyser at dei klokka 18.00 reiser frå staden.
– Vi opprettar sak for å undersøke kva som har skjedd. Heldigvis blei verken folk eller dyr skada, seier Tove Anita Aps, operasjonsleiar.