– Båten har ein del slagside, men den er ikkje på grunn lenger. «Erik Bye» har drege skipet bort frå grunn.
Det sa Anton Kristiansen som er i området, like etter at Redningsskøyta «Erik Bye» hadde hjelpt «Kine» etter grunnstøytinga.
Ikkje lenge etter stadfesta både Kystverket og Hovudredningssentralen opplysningane.
– Fartøyet gjekk fint like over klokka 11.25, etter assistanse frå redningsskøyta «Erik Bye». Skipet går no for eiga maskin til Kristiansund, sa Ove Njøten i Kystverket.
Ute av kurs – dramatisk i naturvernområde
Skipet «Kine», som er registrert på Bahamas, gjekk på grunn klokka kvart over fem fredag morgon.
– Vi fekk melding klokka 07.10 om ei grunnstøyting. Lastebåten var lasta med skrapjern.
– Samtidig fann vi kjapt ut at den inneheldt 40 kubikk med diesel. Det var det vi konsentrerte oss om i forhold til akutt forureining, fortel Njøten i Kystverket.
For skipet var ute av kurs og inne i eit naturvernområde.
– Det var uroa vår i byrjinga. Alle meldingar om grunnstøytingar er dramatiske før informasjonen er på plass.
– Redningsskøyta var på plass klokka 09.00 og situasjonen var stabil, seier Njøten.
– Lekkasje på ballasttankar og vatn i thrusterrommet
Ifølgje lokalkjende augevitne skal det ha vore tre meter djupt i området. Redningsleiar Johan Mannsåker i Hovudredningssentralen i Sør-Noreg fortel at det er uvanleg med båtar i området.
– Det er ikkje eit direkte farleg område, men det er ein god del grunt farvatn i området. Som regel held skip seg unna.
– Elles veit vi ikkje noko om kvifor skipet grunnstøytte, opplyser Mannsåker.
Ingen av dei sju om bord kom til skade. Båten fekk derimot noko skade.
– Det er lekkasje på to ballasttankar og noko vatn i thrusterrommet. Men flyteevna er bra.
– Gjekk situasjonen betre enn venta, med tanke på naturvernområde og store risikoar?
– Ja, det gjekk betre enn venta. Situasjonen har vore stabil gjennom formiddagen.
– Kor dramatisk var det tidlegare i dag då?
– Det var ikkje enormt dramatisk, men alle slike hendingar er dramatiske når det skjer.
Saka held fram under bildet.
Gjekk på grunn tidleg fredag morgon
– Vårt fraktskip «Kine» gjekk i dag morgon klokka 05.00 på grunn nordvest for Smøla.
Det sa skipsreiar Håvard Våge tidlegare i dag fredag.
Like før klokka 11.00 sa Hovudredningssentralen at mykje vind og sjø gjorde ting vanskeleg for Redningsskøyta.
– Mykje vind og sjø gjer det umogleg for dykkarar å undersøke skadane på skipet. Men skipet ligg stabilt på grunn, sa Mannsåker til NTB tidlegare i dag.
Det blei tidleg klart at mannskapet på sju var utanfor all fare.
Vidare ligg saka i Sjøfartsdirektoratet sine hender.