Babyen var berre fem månader gamal då han blei funnen død heime hos foreldra på Sunnmøre i sommar. Etter kort tid blei foreldra arresterte og sikta for mishandling. Samstundes blei Kripos kopla inn i saka.
No utvidar politiet siktinga til drap eller medverking til drap.
– Det skjer på bakgrunn av ei samla vurdering, seier politiadvokat Julie Ulstein ved Møre og Romsdal politidistrikt.
– Er det nye spor i saka som gjer at dei no blir sikta for drap?
– Ja, i den samla vurderinga er det også nye funn i saka, mellom anna inngår den endelege obduksjonsrapporten, seier ho.
Ho vil ikkje gå inn på kva obduksjonsrapporten seier om dødsårsaka.
– Tøff påkjenning
Først var foreldreparet sikta for vald i nære relasjonar, deretter for grov mishandling. No meiner politiet at dei to har gjort seg skuldig i drap på sitt eige barn.
– Umiddelbart er reaksjonen at det er ei svær belastning for min klient. Saka har vore veldig tøff over lang tid, og dette er heilt klar ei kjempealvorleg ytterlegare påkjenning, seier Axel Lange, som representerer mora.
– Kva meiner ho har skjedd?
– Ho klarer ikkje å forstå det, seier han.
Ingen av foreldra vedgår straffskuld.
– Han synest det er uverkeleg å vere sikta i ei slik sak når han veit at han ikkje har gjort noko gale, seier advokaten til barnefaren, Sjur Engelsen Lange.
Neppe ny fengsling
Begge foreldra i 30-åra har vore fengsla i lang tid i haust, men sleppte nyleg ut. Då meinte politiet at det ikkje lenger var fare for at dei kunne øydelegge bevis.
Politiet har vurdert å be om at foreldreparet skulle varetektsfengslast på nytt, før ein eventuell tiltalte og rettssak.
Politiadvokat Julie Ulstein seier dei har landa på å ikkje be om ny fengsling.
Forsvarar Axel Lange er fornøgd med det.
– I denne saka er det rett. Det er strenge vilkår for varetektsfengsling og dei har vore varetektsfengsla, seier han.
Babyen blei gravlagd tidlegare i haust på ein kyrkjegard på Sunnmøre med foreldra og politiet til stades.