Det har vore mykje graving, måling og dokumentasjon. Konklusjonen er at grava var tom. Det var verken noko – eller nokon – i røysa.
Men for omtrent 3500 år sidan blei eit menneske gravlagd her.
– Det er snakk om mange tusen år, så det skal noko til at det blir bevart. Eg er litt skuffa, men ein må ta det som det er, seier utgravingsleiar Trond Eilev Linge.
– Overraskande
Arkeologane hadde ikkje venta å finne ei gravrøys to meter under vegen.
– Dette var overraskande. Det er ikkje slik ein forventar, seier Linge.
Under utgravinga kom det også fram eit rikt steinalderfelt, men det var gravrøysa som gjorde arkeologane mest nysgjerrige.
– Det hadde vore heilt utruleg om det låg dekorerte kister inni der, men vi veit av erfaring at nokre gongar er slike røyser tomme, seier Linge.
Kollegaen Leif Inge Åstveit som er arkeolog, er einig i at det var uventa.
– Spesielt i bronsealderen gjorde dei mykje rart i samband med ritual når nokon døydde. Så det kan vere at dette berre er snakk om ei enkel markering, legg han til.
Ei øy full av historie
Øya Giske utanfor Ålesund er svært interessant i norsk historie. Det har vore mange funn frå eldre steinalder til vikingtid og mellomalderen.
Her var hovudsetet for den mektige Arnung-ætta, med slektsband til både Austråt og Bjarkøy.
– Det er rart å tenke på kva vi har gått på, seier Roar Giskegjerde og ler.
Giskegjerde hadde inga aning om at det var ei gravrøys like ved huset, men var spent på resultatet.
– Mest sannsynleg er det vel slektningane våre som ligg her.
Men det får ein nok ikkje svar på. I alle fall ikkje frå denne utgravinga. Det – eller den – som eventuelt har lagt der er nok borte for lengst.