Mattilsynet fann 30 sekker med eit stoff som heiter TQI Anpex 200 ved Jangaard Export AS Nordmøre fiskeindustri sin fabrikk i Averøy den 13. oktober.
– Stoffet inneheld fosfat, som er ulovleg å bruke i klippfisk og saltfisk industrien, seier Kjell Jensen, seniorinspektør i Mattilsynet i Kristiansund til NRK.
Fosfat auker vekta
Stoffet fosfat fins naturleg i fisk og kjøt og er ikkje rekna for å vere farleg i små mengder. Det er strenge reglar for bruk av fosfat fordi dersom fosfat vert tilsett fisken, vil det auke vekta og på den måten "lure" kunden.
I tillegg vert fisken bleika, slik at gamal og dårleg fisk kan sjå heilt fersk ut.
– Ikkje til ulovleg bruk
Bruk av fosfat for å auke vekta er forbode, og leiinga i Jangaard export avviser at stoffet som no er funne på fabrikken skulle brukast til det formålet.
– Vi tilsett ikkje fosfat i fisken slik islendingane gjer. Vi har det på fabrikken fordi vi brukar det i produksjon av farse, og det er lov, seier Gunnar Haagensen, styreformann i Jangaard Export.
Nytt prosjekt
Jangaard Export er ein av de største fiskebedriftene i Norge og har hovudkontor i Ålesund. Denne veka har dei vore i søkelyset fordi leiinga har bedt myndigheitene om å tillate bruk av fosfat i fisk.
Haagensen seier dei jobbar med eit prosjekt for å utvikle eit ferskfisk-produkt der det er lovleg å tilsette det stoffet som Mattilsynet fann, og at det var derfor stoffet var på fabrikken.
Ikkje varsla
– Det er likevel ikkje lov å setje i gong med eit slikt prosjekt utan å varsle Mattilsynet. Vi har kravd å få ei detaljert skildring av det omtala prosjektet, svarar Jensen.
Mattilsynet fatta eit hastevedtak som forbyr oppbevaring og bruk av fosfat ved fabrikken.
Les også:
Kan bli etterforska
Fokuset på bruk av fosfat i saltfisk har fått kontrollorganet for EØS-avtala til å reagere.
– Vi vil følgje med og sjå korleis saka utviklar seg. Svaret vi får frå norske myndigheiter i neste veke vil avgjere om vi vil forfølgje saka vidare, seier Olafur Valsson, leiar for matsikkerheit i ESA.