Ferjeselskapa krev samla rundt ein million kroner frå Møre og Romsdal fylkeskommune for tapte billettinntekter på grunn av auken i talet på elbilar.
Vil ha erstatning
Dag Hole i samferdselsavdelinga seier fylkeskommunen får millionkrav frå reiarlag og bompengeselskap som ergrar seg over tapte elbilinntekter.
Foto: Gunnar Sandvik / NRK– Vi har teke imot krav frå reiarlaga om dekning av elbilbruk. Det er i ein relativt beskjeden grad, men det er ei problemstilling som vil forsterke seg i takt med at bruken av elbilar vert meir og meir vanleg, fortel Dag Hole i samferdselsavdelinga.
I Trøndelag vurderer fylkeskommunen å gjere slutt på gratis ferje for elbilar på strekninga Flakk-Rørvik fordi det fører til store underskot. No merker ferjene også i vårt fylke auka tap i billettinntekter fordi elbilane reiser gratis.
– Kva gjer de med krava frå ferjeselskapa?
– Dei er til behandling nett no. Delar av krava vil vere naturleg å imøtekome, men vi er ikkje ferdige med behandlinga, så eg kan ikkje dra ein endeleg konklusjon, avsluttar Hole.
- Les også:
Artikkelen held fram etter bildet.
Bilseljar hjå Bavaria i Molde, Bjørnar Høstmark, fortel om lang ventetid for å få ny elbil. Demobilen BWM i3 er stort sett på utlån, så han kan berre vise NRK ei brosjyre av bilen.
Foto: Gunnar Sandvik / NRKMange goder
Elbilsalet har eksplodert i Noreg siste året og toppar salet av nye bilar. Men mange av elbilgodene, som gratis ferje og fritak på bomvegar og parkering, er under press og kan forsvinne – sjølv om Stortinget har freda ordninga ut 2017.
Les Ytring-kronikk:
– Demonstrasjonsbilen står sjeldan i fred. Vi har faktisk venteliste for å få prøve bilen, fortel Bjørnar Høstmark ved bilforretninga Bavaria om den sterke interessa for elbil.
– Kjøper elbil for pengane sin del
Per i dag må kundar vente i eit halvt år før dei kan få kjøpt elbil frå bilforhandlaren som held til i Molde. Høstmark har inntrykk av at det er sparte kroner, heller enn miljø, som er trekkplasteret for kundane.
– Grunntanken bak elbil er miljøomsyn, men dessverre så tenkjer folk mest på at dei vil kunne spare ferje- og bomutgifter. Det synest eg vert litt feil, seier han.
– Men dersom moglegheita for å sleppe bompengar, ferjetakst og parkeringskostnader forsvinn,- korleis trur du det vil påverke elbil-salet?
– Det trur eg vil påverke interessa ein heil del. Somme er sjølvsagt interesserte uansett, men det er bompengar og ferjetakstar som er det heilt store, seier bilseljaren.
