Tak på fjøs har kollapsa – berga ut kyr

Ingen personar skal vere skadd etter at eit tak delvis har kollapsa i Elnesvågen.

Det var mellom 10 og 15 kyr i fjøset. Alle er uskadde, utanom ein mindre kuttskade på ei av dei, ifølgje brannvesenet.

Dei er på staden og har jobba med å berge ut dyra og plassere dei på eit jorde.

– Det var litt vanskeleg, for dei ville ikkje ut, så vi jobba litt for å få dei ut. Vi har heldigvis avløysarar som brannfolk, seier Kent-Ronny Hammerø, innsatsleiar i brannvesenet.

Store snømengder

Han fortel at det er dei store snømengdene og tyngda på snøen som er hovudårsaka til at taket kollapsa.

– Huffamei, det er noko drit. Men det ser ut som dei trivst ute på snøen, seier bonde Jan Ingvard Tornes.

Snart skal også kyrne kalve.

– Det skal ganske fort skje. Det er ikkje noko anna å gjere, det er frykteleg tyngde på snøen oppå der, seier Tornes.

Han må avbryte intervjuet med NRK for å stanse nokre kyr som vil inn i låven igjen.