Utdanningsdirektoratet har valt ut totalt 34 kommunar som blir realfagskommunar i 2015. I alt 65 kommunar søkte om å bli med på satsinga.
– Eit viktig mål med realfagskommunane er å lære korleis barnehagar og skolar kan løfte seg ut av realfagsproblemet vi har i Noreg, seier kunnskapsminister Torbjørn Røe Isaksen i ei pressemelding.
– Skal norske elevar bli betre i matematikk og naturfag må vi styrke den lokale innsatsen – i den enkelte kommune, og i den enkelte skule og barnehage, held han fram.
- Les også:
Heilskapleg satsing
Utdanningsdirektoratet har lagt vekt på at realfagskommunane skal ha ein heilskapleg satsing på realfag både i skular og barnehagar. Kommunane skal også samarbeide med lokalt næringsliv og lokale kompetansemiljø innan realfag.
Øystein Johansen, kommunalleiar for kultur og oppvekst i Sande kommune, meiner tiltaket kan bidra til ei meir målretta kompetanseheving.
– På denne måten kan vi samordne og løfte kompetansen til det beste for elevane. I tillegg forpliktar vi oss til å gjennomføre tiltak, samtidig er det ei draghjelp i form av økonomisk støtte, så eg er svært fornøgd med at vi blei valt, seier Johansen.
– Eg er overraska over at fleire ikkje har søkt, held han fram.
- Les også:
– Alvorleg realfagsproblem
Dei 34 realfagskommunane skal spegle utfordringane for realfag i Noreg. Difor har både kommunar med svake resultat og kommunar med gode resultat har blitt valt ut. Det har også vore viktig med ulik storleik og geografisk spreiing for å få flest mogleg erfaringar.
Røe Isaksen meiner norske skular har eit alvorleg realfagsproblem.
– 37 prosent av elevane som kom opp i skriftleg eksamen i matematikk på 10. trinn i fjor, fekk karakteren 1 eller 2. Samtidig veit vi at karakteren elevane får i matematikk, er det som har størst betydning for om dei greier å fullføre vidaregåande skule eller ikkje, seier kunnskapsministeren.
Severin Roald, pedagogisk rettleiar i Giske kommune, meiner det er eit klart behov for å heve realfagskompetansen blant elevane.
– Når vi får eit tilbod om å samarbeide med dei sterkaste fagmiljøa i Noreg så er det klart vi søkjer, seier han.
Roald meiner satsinga kan ha positive ringverknader både for lærarar og elevar.
– Vi har tronge midlar til kurs og kompetanseutvikling. Med desse midla kan vi gjere ein meir solid jobb enn vi kunne gjort elles, seier han.