Onsdag for snart to veker sidan forsvann Anja Weløy Aarseth frå ein joggetur på byfjellet Aksla i Ålesund. Etter ein enorm leiteaksjon vart studenten funnen drepen like ved ein tursti tre dagar seinare. Ein 23 år gamal mann frå Ålesund har tilstått drapet. Saka rysta ikkje berre folk i Ålesund, men heile landet.
Stille i eitt minutt
I dag heidra medstudentar Anja sitt minne med eitt minutts stillheit på Høgskulen i Ålesund.
– Det var deileg å kunne markere det slik. Heile saka har gått inn på alle i Ålesund og spesielt studentane, seier Pernille Harket Bakke.
Ho har brukt byfjellet Akla til trening nesten kvar dag og tenkjer mykje på det som skjedde.
Student Linn Ulstein meiner markeringa i dag var verdig.
– Eg kjem alltid til å tenkje på det som skjedde, seier Ulstein.
Bussane stod stille
Også kollektivtrafikken stod stille i eitt minutt klokka 15.
På bussterminalen i Ålesund synest folk det var fint å kunne heidre 21-åringen.
– Det er bra at vi kan heidre denne stakkars jenta. Det var forferdeleg for Ålesund at dette skjedde. Håper at det aldri meir skjer, seier Cath Marø Farstad som sit og ventar på bussen.
Bisett i dag
I dag vert Anja Weløy Aarseth bisett i Storetveit kirke i Bergen. Kyrkja har plass til 600 personar.
Familien ynskjer ikkje at media skulle vere til stades. Dei er i djup sorg, som bistandadvokat Einar Råen beskriv som sjokkprega.