Gryta til teikneseriefigur var fylt med LSD

Det var då tollarane opna eit brev på Østlandsterminalen 5. november at dei fann ei ark med identiske bilde av Miraculix frå teikneserien Asterix.

I gryta på teikninga viste det seg derimot at det ikkje var styrkedrikken han er kjent for å lage, men altså LSD.

Postsendinga inneheldt 160 drypp med LSD. LSD blir seld som tablettar, kapslar eller i flytande form. Det blir ofte drope på trekkpapir og delt i små dekorerte firkantar. Kvar bit er ein dose.

Lars Teigen, seksjonssjef i Tolletaten, seier dette er eit betydeleg beslag.

– Dessverre har vi sett ein oppsving i beslag av LSD i postsendingar. Det er urovekkande, då dette potensielt er eit veldig farleg stoff, seier han.

• Les også: Stengte landegrenser: Flere bestiller narkotika på nett

Ser ein auke i beslag

Teigen fortel at dei har hatt ein auke i postbeslag av LSD dei siste to åra, særleg blant ungdomar. Også koronapandemien og stengde grenser har ført til ein auke av narkotika i postsendingar.

– Vi har sett ein vesentleg auke, men då mest av cannabis, fortel Teigen.

I juli kunne NRK fortelje at frå mars og til slutten av juni i år har postinnføring av hasj auka med 244 prosent, marihuana med 422 prosent og cannabis-frø med 947 prosent. Dette samanlikna med same periode i fjor.

Mannen frå Ålesund som postsendinga var adressert til blir meldt til politiet for forholdet og saka blir etterforska vidare lokalt.

• Åtvarar mot narkosal på sosiale medium: – Barn ned i 12-årsalderen er mottakarar