Politiet har ikkje grunn til å tru at brannen ved utestaden Kick Off i Kristiansund i januar var påtent. – Vi undersøker no om brannen kan skuldast ein teknisk feil. Gjenstandar er sende inn til analyse og vi ventar på svar, seier Knut Endreseth til NRK. Han er seksjonssjef for etterforsking i Kristiansund.
Like etter klokka 05.00 natt til laurdag melde politiet om ein brann ved Comfort hotell i Kristiansund sentrum. Hotellet er under oppussing og det skal ikkje vere gjestar ved hotellet på dette tidspunktet. Ifølgje operasjonsleiar i politiet, Borge Amdam, skal brannen ha starta i den delen der utestaden Kick Off ligg. Naudetatane rykte ut til staden og fekk etter kvart sløkt brannen. – Utestaden hadde vore open tidlegare på kvelden, men var stengt lenge før brannen starta. Det er så langt uklart kva som er årsaka til brannen, men det vil bli gjennomført åstadsundersøkingar når det er mogleg, seier Amdam. Skadeomfanget er så langt ukjent, men det skal ha blitt ein del skader innvendig som følgje av brannen.