Fann 160 meter langt ulovleg laksegarn

Det var tips frå publikum som gjorde at representantar for Statens naturoppsyn reiste ut til holmane utanfor Vikan i Hustadvika i Møre og Romsdal onsdag kveld.

Der fann dei eit 160 meter langt drivgarn. Utforminga var slik at Michael Eklo i naturoppsynet ikkje er i tvil om at det var laks fiskarane var ute etter.

– Garnet var svært godt eigna til å ta laks med og var plassert i eit område der laksen kjem inn til kysten. Dessutan var dimensjonane slik at alt tyder på at det har vore meininga å ta store mengder fisk, seier Eklo.

Sårbare laksestammar

Bestandane av laks og sjøaure går stadig nedover, og Statens naturoppsyn ser svært alvorleg på laksefiske i havet.

Hustadvika ligg sentralt plassert i området der laks frå ei rekkje større vassdrag kjem inn frå Atlanterhavet. Mange av laksestammane er svært sårbare. Enkelte elvar er til og med stengde for laksefiske.

– Når ein fiskar i ytre havområde har ein ikkje oversikt over kva genetisk materiale ein fiskar på. Det er lettare å styre fisket og få oversikt over stammane når fisket går føre seg i tilknyting til vassdraga, forklarar Eklo.

Død fugl i garna

I tillegg til at denne måten å fiske laks på set laksestammane i fare, viste beslaget også at slike garn drep fugl.

– Det var døde fuglar i garnet. Her var det både teist og gås. Dette var jo veldig uheldig. Vi veit jo at det ikkje er nokon god død å bli hekta fast i eit slikt garn.

Funnet på Hustadvika går inn i ei rekkje av tilsvarande funn, der dimensjonane er så store at det har potensial til å fiske svært mykje fisk ulovleg.

– Vi veit ikkje, men det er sannsynleg at den ulovlege fangsten ikkje berre er til eige bruk, men også er økonomisk motivert. Dette er alvorleg miljøkriminalitet, seier Eklo.

Vanskeleg å straffeforfølgde

Utan fleire tips frå publikum er det mykje som tyder på at det ikkje blir ytterlegare straffeforfølging i ei sak som dette. Garnet var utan merke og naturoppsynet veit ikkje kven som står bak.

– Vi har ingen namngjeven gjerningsperson i dette tilfelle. Men hendinga er registrert og vi deler informasjonen med politiet og kystvakta, seier Eklo.