Ekstremvêret Tor røska med seg hustak, garasjar og ikkje minst tre.Måndag har mannskap frå Ålesund kommune vore ute og rydda skog. Driftssjef i Ålesund kommune, Martin Hessen, åtvarar folk utan erfaring mot å rydde opp etter større rotvelt på eiga hand.
– Trea kan stå i spenn og vere vikla inn i kvarandre. Dersom du tar ein rotvelt på feil måte, kan du vere uheldig og få den over deg, seier Hessen.
Martin Hessen er driftssjef i Ålesund kommune. Hans avdeling er i full gang med opprydding etter uveret.
Foto: Maria Kristina Vevang / NRKLumsk rotvelt
Mannskapet som ryddar opp etter orkanen fredag, er godt trent. Mykje takka vere uveret Dagmar i 2011, som øydela skog for 100 millionar kroner. Det gjeld å lese situasjonen og ta treet på riktig måte.
– Ein rotvelt er lumsk. Du kan sage den ned og den står. Og så kan den plutseleg etter nokre dagar klappe ned, seier Hessen. Han meiner at å hogge stormfelte tre er det farlegaste ein kan gjere med ei motorsag.
LES OGSÅ:
Som sommardekk på vinterføre
Ingebrigt Landsem åtvarar folk mot å rydde opp falne tre etter orkanen på eiga hand.
Foto: privatKvart einaste år er det dødsfall og alvorlege skadar i forbindelse med vindfallshogst.
Ingebrigt Landsem frå Rindal held kurs for skogsarbeidarar og lærer dei korleis dei skal rydde etter uver på ein trygg måte.
– Det er livsfarleg arbeid. Utan erfaring er det mykje uføresett som kan skje. Stokken kan slå deg i hel, seier Landsem. Han ber privatfolk om å ikkje sette i gang opprydding etter uveret på eiga hand, men kontakte fagfolk.
Han skildrar rydding av rotvelt som ein hasardiøs jobb.
– Utan kunnskap er det som å køyre bil på vinterstid med sommardekk, seier Landsem.
