– Samarbeid må til for at ikkje andre delar av landet skal gå framfor oss, seier styreleiar i Møre og Romsdal Reiseliv, Arne Aambakk.
Han er overbevist om at destinasjonsselskapa vil lukkast med eit samarbeid.
- Les også:
Aambakk blir forundra om ikkje destinasjonsselskapa på Sunnmøre vedtar samanslåing, til liks med Nordmøre og Romsdal.
Endring
Han syns at destinasjonsselskapa i fylket har gjort ein god jobb i 2014, trass i sterk kronekurs. Men "ok" er ikkje bra nok, meiner Aambakk.
– Det er fleire ting vi ikkje er dyktige nok på, og difor meiner eg at vi må gjere endringar.
Reiselivsdirektøren i Innovasjon Norge, Per-Arne Tuftin, seier at Møre og Romsdal gjer det betre enn mange andre stader.
– Vi ser ei god auke, og det er på grunn av gode produkt og ein fantastisk natur, seier Tuftin.
Møre og Romsdal har og satsa på vinterturisme. Og det med hell.
– Vi ser ein topp i både vinter- og sommarsesongen. Det er det mange som er misunnelege på. Men vi må ikkje gløyme sommaren - det er då dei fleste turistane kjem.
Gjer kvarandre gode
Aambakk meiner at eit samarbeid mellom destinasjonsselskapa i fylket vil gjere dei meir slagkraftige. Han er glad for at Nordmøre og Romsdal har gått saman om turistane.
– Dei vil nok stå fram som eit eksempel og hjelpe andre på vegen. Det er ein spesiell bransje med store aktørar som er vande med å styre sjølve. Men skal ein bli god må ein gjere kvarandre gode, meiner styreleiaren.