Etter ei lita pause startar haustsesongen i 1. divisjon opp igjen for fullt med eit lokaloppgjer søndag.
Førre gong dei to laga møttest var i slutten av mai. Då trakk Kristiansund BK det sterkaste strået og kunne reise heim frå Ulsteinvik med ein 1–0 siger i bagasjen.
Begge trenarane trur det blir ein krevjande kamp.
– Det blir nok ein tett kamp i dag også. Vi er to lag som kjenner kvarandre godt og eg forventar ein jamn kamp, seier Sindre Eid, hovudtrenar i Hødd.
– Det blir eit bikkjeslagsmål. Det er alltid tett når vi møtes. Det laget som klarer å halde hovudet kaldt og som vil det mest, vinn kampen, seier Christian Michelsen, hovudtrenar i Kristiansund BK.
Klar for å kome i gang
Hødd ligg på ein foreløpig 3.-plass på tabellen med 25 poeng. Med fire poeng mindre ligg KBK på ein 7.-plass så langt i sesongen.
Sindre Eid, hovudtrenar i Hødd, ser fram til ein jamn kamp i Kristiansund.
Foto: Kari Nygard Tvilde / NRKHovudtrenaren i Hødd seier at laget har gledd seg og ser fram til å kome i gang med haustsesongen.
– Vi er kampklare og føler at vi har førebudd oss godt til denne kampen. Vi er fokuserte på oss sjølv og den jobben vi skal gjere, seier Eid.
– Så får vi sjå kva resultatet blir når kampen er ferdig, held han fram.
- Les også:
Viktig kamp for KBK
I Kristiansund håpar trenar Christian Michelsen å kunne gjenta resultatet frå førre 1.-divisjonskamp mot Hødd. At kampen er eit lokaloppgjer gir ekstra motivasjon, meiner han.
– Det er noko spesielt med slike lokaloppgjer, og det er viktig å vere best. Vi forventar som sagt ein tett kamp, og då er det ekstra kjedeleg å tape, seier han.
Trenaren er stort sett fornøgd med vårsesongen, men er førebudd på ein krevjande haustsesong der kvar kamp blir viktig.
– Hødd ligg framfor oss på tabellen, og sann sett er det ein viktig kamp. Haustsesongen er i gang og toget går dersom ein har lyst til å vere med å kjempe om dei seks øvste plassane. Då tel kvart poeng, seier Michelsen.
- Les også:
