Dei smitta blir sett i isolasjon på båten, opplyser Ålesund kommune.
Hamnekapteinen forsikrar at smittevernet er varetatt og at mannskapet ikkje har lov til å kome i land.
– På grunn av tekniske problem er båten lagt til kai på Stornespiren i Ålesund, fortel hamnekaptein Steve Hansen.
Fekk vite om smitten laurdag
Kommuneoverlege Victoria Guzenko Natvik i Ålesund seier dei fekk vite om smitten laurdag. Ho seier det er 34 menneske om bord i båten.
Vanskeleg å finne plass
– Vi må avklare korleis vi skal ordne anten isolasjonsbustader for dei som er smitta, eller karantebustader for dei som framleis har negativ test, seier Natvik.
Ho seier at situasjonen er utfordrande.
– Kommunen har ikkje kapasitet til å huse alle om bord på så kort varsel, seier Natvik.
Kommuneoverlegen seier at mannskapet ikkje får forlate båten før Ålesund kommune har fått klarheit i kva som vidare skal skje. Så langt har ingen forlate båten, og ingen kan forlate den før dei får avklart kva som skal gjerast vidare.
– Vi veit ikkje kor lang tid det kjem til å ta. Vi håpar vi veit meir i løpet av dagen, i verste fall i løpet av morgondagen, seier Natvik.