- Ikkje heng piratane

- Det var radikalt. Det blir feil, og det kan bli farleg for sjøfolka, meiner Jarle Johansen.

Det radikale er utspelet til skipsreiar Jacob Stolt-Nielsen. I eit lesarinnlegg i Dagens Næringsliv skriv han at det berre er makt piratane forstår. Difor føreslår han at dei skal avrettast på staden.

Den eneste måten å få piratvirksomheten til å avta på er å henge piratene. Det eneste språket de forstår er makt , seier han til avisa.

• Utanriksminister Støre: - Forstår redernes frustrasjon

- Vil få røffare behandling

For fram til no har ikkje sjøfolka og piratane vore fiendar, meiner Johansen. Han viser til si eiga oppleving då han vart kidnappa i Nigeria for fem år sidan.

Om mannskapet hadde vore væpna, trur han ikkje dei ville fått like god behandling.

- Dei skipa som er tungt væpna blir då ikkje tekne, medan dei som ikkje er det blir tekne. Dei vil bli utsette for hardare behandling medan dei er fanga. Om dei i det heile tatt kjem seg ut av fangenskap tvilar eg på, seier Johansen.

- Aldri meir til Nigeria

Det sa Jarle Johansen då han i august 2006 heldt pressekonferanse i Ålesund. Han var nett sett fri av kaprarane som heldt dei fanga utanfor Nigeria.

• LES MEIR OM KIDNAPPINGSDRAMAET:
• - Aldri mer til Nigeria
• Heime igjen
• Sjømennene er sett fri
• Detaljer igjen før løslatelse
• Går mot løsning i Nigeria
• Forhandler videre med kidnapperne

Dramaet starta 8. august, då åtte-ti tungt væpna menn skaut på skipet frå ein gummibåt. Forsyningsskipet Northern Comrade vart borda, og mannskapet kidnappa.

- Samanlikna blir ei helvetesveke i Forsvaret ingenting, seier Johansen nesten fem år etter.

Han har no lagt episoden så langt bak seg at han ikkje vil rippe for mykje opp i det.

- Men eg unnar ikkje min verste fiende å prøve dette, seier han.

- Vil gå fleire liv

Johansen har diskutert temaet med mange andre kapteinar som har vore i same områda. Han meiner stemninga er delt blant sjøfolka. Medan ein del vil ha væpna mannskapet, meiner ein annan del at dette bør vere opp til militæret.

Artikkelen held fram under bildet.

- Eg er av den siste typen, seier Johansen.

- I det sjøfolka byrjar skyte tilbake mot piratane og drep deira brødre, då vil dei bli sett på som fiende, og innstillinga hos piratane vil forandre seg. Då vil det gå mange fleire liv hos sjøfolka når dei fyrst blir tekne, trur han.

- Vil ikkje avskrekke

Trass i at han ikkje er einig i det Stolt-Nielsen føreslår, ser han at noko må gjerast.

- Alle vil gjere noko med det, men det er snakk om å gjere dei riktige tinga. Reiarane greier ikkje heilt å tenkje seg inn i sjøfolka si rolle. Det er sjøfolka som blir ramma, så dei må styremaktene høyre på. Det er ikkje alltid dei luraste folka er reiarar, seier den tidlegare kapteinen.

Han er veldig glad for at han saman med mannskapet kom unna i 2006. Men om det blir aktuelt med væpning trur han ikkje alle vil vere like heldige. For i Nigeria var det ikkje så farleg for folk å bli tekne for kidnappinga.

- Nokre tusen kroner i lomma er mykje viktigare enn om dei skulle bli hengt. Det spelar inga rolle for dei, fordi dei har ikkje noko å leve for likevel, seier han.

- Stopp dei på stranda

- I staden for å avrette dei må ein stoppe piratane tidlegare, seier Johansen.

For med små ressursar og ein blokkade av den somaliske kysten trur han at dei kunne stoppa problemet. Når piratane fyrst er komne ut til skipa er det for seint, trur han.

- Stopp dei før dei kjem seg ut i småbåtane. Dei må ikkje kome seg frå stranda, meiner han.