Sei og suppa

Reinsk fisken godt, skjer han så i skjever. Legg fisken i kaldt, rennande vatn ca. 1 time.

Kok opp 5 liter vatn i ein stor og god kjele. Ha i salt. Det skal smaka så salt som sjøvatn! Ha gjerne laurbærblad oppi, for å få litt meir smak på krafta. Men det likar ikkje farmor mi, så du kan godt droppa det!

Imens så vaskar du 1 purreløk og skreller 5 gulrøter. Skjer både purreløk og gulrøter i skjever.
Når vatnet har kokt opp, legg du i fiskestykka. Lat desse trekkja i ca. 15 minutt. Det er viktig at du ikkje har varmen på meir enn svakaste styrke.

Set på potetene når du legg oppi fisken. Kok potetene i salta vatn.

Nå går me i gang med suppa. Hugs å halda fisken varm imens. Han skal framleis liggja i kjelen med kraft.

Suppa
Smelt 60 gram smør i ein tjukkbotna kjele. Ha i 60 gram kveitemjøl og rør. Då får du ei lys jamning. Set opp varmen og start å spe med den varme fiskekrafta som seien ligg i. Ha i ca. 1 liter kraft, kanskje litt meir. Kok suppa på svak varme i 10 minutt, ha i fløyte og gulrot, kok 5 minutt til. Ha så i purreløken, lat den få koka med i 2 minutt. Smak til med salt og litt pepar.

Nå er det mat!
Du kan velja å eta suppa før fisken. Me et alt i lag, det er best! Og då gjer du slik: Legg seistykka på eit fat og ha potetene på bordet i ein bolle. Suppa må også på bordet! Ha potet og fisk på ein tallerken, og suppe i djup tallerken på sida. Hugs fat til reinsking og ikkje minst, hjelp dei små borna først. Smelta smør smakar også godt på potetene.