Fálesnuori bargiidbellodaga suohkanstivrra áirras, Ingar Eira, gal ii mieđa daid čuoččuhusaide ahte ruvkedoaibma Riehppovuonas Fálesnuori suohkanis galggašii leat hehttehussan boazodollui.
- Guldal Ingar Eira dás:
– Dál plánejuvvo ruvkedoaibma eatnavuolde, ja mu dieđu mielde gal bohccot han eai guođot eatnanvuolde. Nu dadjá Fálesnuori bargiidbellodaga suohkanstivrra áirras, Ingar Eira.
Ovttajienalaš doarjja
Ingar Eira lei mielde suohkanstivrras gos Nussira ruvkeplána ovttajienalaččat dohkkehuvvui Fálesnuori suohkanstivrras. Eira dadjá ahte áidna ášši mas lei guovtteoaivilvuohta suohkanstivrras, lei gosa ruvkebázahusaid galge luoitit. Muhto das Fálesnuori suohkanstivrra eanetlohkku doarjjui bázahusaid luoitima Fálesnuorrái, dadjá Ingar Eira.
Imášlaš doarjja
Ingar Eira atná imašiin jus Sámediggi ruđalaččat áigu doarjut Fieddara orohaga jus sii áigot lágasteami bakte áigot geahččalit bissehit ruvkedoaimma.
– Dat mii lea imaš lea jus Sámediggi ovtta ealáhusa áigut doarjut. Sámediggi han lea buohkan sámepolitihkalaš ásahus, ja dalle gal eai leat Sámepolitihkkarat ipmirdan mii sin rolla lea. Jus nu dahket, de gal Sámediggi maiddái ferte eará ealáhusaid maiddái doarjut, dadjá Inga Eira.
Váidet Nussira luoitinlobi
Sámediggi lea váidán Birasgáhttendirektoráhta mearrádusa mii addá Nussir ruvkefitnodahkii lobi luoitit ruvkebázahasaid Riehppovutnii Fálesnuori suohkanis. Sámediggi bivdá Dálkkádat- ja birasdepartemeantta rievdadit mearrádusa, ja biehttalit Nussir ohcama beassat čađahit ruvkedoaimma nuoskkidanlága vuođul.
Dáppe Riehppovuonas Fálesnuori suohkanis dat Nussir áigu álggahit ruvkedoaimma.
Foto: Jan Harald Tomassen / NRKNorgga Luonddugáhttenlihttu ovttas 11 eará biras-, astoáigge- ja ealáhusorganisašuvnnaiguin váide ovdal juovllaid Norgga EFTA bearráigeahččanásahussi ESA:i go oaivvildit ahte Norga rihkku EO čáhcedirektiivva go leat dohkehan luoitit ruvkebázahusaid sihke Førdevutnii Sogn ja Fjordane fylkkas ja Báhčaveaivutnii ja Riehppovutnii Finnmárkku fylkkas.
