Dán jagá Barents Rescue gádjunhárjehus lágiduvvo Davvi-Romssas, ja lea bidjon deaddu dasa movt čovdet váttisvuođaid jus Nuorášvárri siigá merrii ja dagaha tsunamibáruid. Lagabui 700 olbmo servet hárjehallamii, ja leat gádjunveagat sihke Ruoŧas, Suomas, Norggas ja Ruoššas.
Ivgu suohkan lea guovddáš suohkan hárjehallamii ja suohkana kriisajođiheaddji, Hilde Grønaas dadjá leat dehálaš hárjahallan maid sidjiide ja leat buori jođus bargguin.
Gádjunhárjehusas leat 700 olbmo mielde
Ivgu suohkana kriisajođiheaddji, Hilde Grønaas dadjá ahte sii álge juo mannan bearjadaga gádjunhárjehallamin ja ahte ihttin álget hárjehallamin mas leat 700 olbmo mielde.
– Ivgu alggii gádjunhárjehallama mannan bearjadaga, nugo vuostáiváldit dieđuid mediain ja álbmogis. Odne čoahkanit buohkat geat leat fárus hárjehallamis Romsii gos dárkileappot čilgejuvvo sisdoallu. Easka ihttin algá ieš gádjunhárjehus gos lagábui 700 olbmo leat fárus. Hárjehallamis besset oaidnit man bures lihkostuvvet gádjunbargguin, gos earret eará galget gádjut olbmuid heahttedilis, muitala Grønaas.
Ránnjasuohkanat servet maid
Grønaas muitala ahte ránnjasuohkanat maid servet hárjehallamii.
– Maiddái Gáivuotna ja Omasvuotna servet hárjehallamii. Deháleamos hárjehallamis lea ahte gulahallan ja ovttasbargu dán njealji riika doaibma. Dát galgá maid veahkkin Barents gullevaš riikaide ovttas čoavdit gádjunbarggu heahtedilis, dadjá Ivgu suohkana kriisajođiheaddji Hilde Grønaas.
- Guldal ášši: