Anna Tobiassen lea 89 jahkásaš nisu gii searvá boarrásiid/ seniordánsii, iežas lohká leat boarraseamos dánsáriin. Sutnje lea buorre vuolgit olbmuid deaivat, ja erenomáš buorre lea go beassá vel lášmmohallat.
Ferte oaivvi geavahit
Anna Tobiassen oaivvilda leat buorre dánsut danne go de ferte geavahit oaivvi, ferte smiehttat mo galgá lihkadit. Iežas lohká leat geahččalan leahkit son gii jođiha/mearrida go dánsu, ja dange lohká mannan bures.
Buorre vuohki oažžut vara johttit buorebut
Lea maid buorre lihkadit, go dalle han varrajohtu šaddá buoret. Dan lohká maid Boarrásiid/ Seniordánssa jođiheaddji Mari-Ann Nilssen. Ja son lohká olbmuid boahtit sihke Unjárggas ja Deanus dán dánsumii.
Nilssen muitala maid iežaset oažžut gielddain ruhtadoarjaga jođihit dánssa, go boarrasat olbmuide lea buorre beassat lihkadit.
Almmaiolbmot gal eai leat gallis dán dánssas. Anna Tobiassen váillaha sin, ja son gal duođai illuda go beassá deaivat olbmuid. Seammáš beassá son vel lášmmohallat. Iežas lohká dovdat bures rupmašis ahte lea lášmmohallan, ja dat lea dakkáraš buorre dovdu.