Ein vakker sommardag i mellomkrigstida blir det i hovudstaden arrangert ein båttur for einslege, religiøse kvinner, slik at dei skal få kome seg ut av dei små hyblane sine og få litt sol på kroppen - i ærbare former. Denne turen endrar livet til fire menneske:
Kaptein Knudsen blir forgapt i den vakre enka Magda. Kanskje skjedde det same med den nokså bryske Sigrid Ravnegård. I alle fall flyttar ho utan noko om og men inn i det tronge husværet der Magda bur med dottera si, fortrenger jentungen frå dobbeltsenga og tek sjølv plassen der. I denne senga blir det ganske snart fødd ein stor visjon: Dei to skal lage eit kristeleg plateselskap.
Med gudsfrykt og viljestyrke blir Basunen ein realitet og ein suksess. Magda og Sigrid blir dei allmektige og etterkvart temmeleg fryktinnegytande sjefane for eit konglomerat av plateproduksjon, butikkar og eigedommar til Guds ære, medan den forelska kaptein Knudsen blir den evig underdanige sjåfør.
Frelsesfryd og tungetale
Rundt Basunens vekst og fall teiknar Tor Edvin Dahl eit bilde av eit miljø få kjenner frå innsida, og han gjer det i stor detalj. Frelsesfryd og tungetale knyter sterke band mellom venene, så sterke at den som vågar å ønskje seg andre stader får store problem.
Forsamlinga tek vare på sine, og som alle sekter har dei sine grensevaktarar, som både veit kva som er synd og kva ein elles skal passe seg for. Her gjeld regelen om alt eller ingenting: vil du ha fellesskap med Gud og venene må du forsake verda og underkaste deg dei som bestemmer. Slikt krev offer, og offer blir gjort.
Men meir enn ein roman om maktovergrep i tette, religiøse miljø, er dette ei historie om to kvinner som gjennom det same miljøet får sjølvtillit og handlekraft til å utrette store ting. Parallellane til Dag Solstads bok om ”den store politiske vekkelsen” er mange og tankevekkande. Desse damene ville ikkje ha nølt med å sykle på vatnet - dersom det var vegen til Perleporten.
Kulturnytt, NRK P2, 20. desember 2006