Her er sakene vi klikka på i 2012

Det er ein variert meny som toppar lista over årets mest leste saker.

• LES OGSÅ: Dette skjedde i året som gjekk

Dette er dei ti mest leste sakene i 2012

1. Var med på 260 julebord

NRK fortalde i byrjinga av desember om Endre Gjerde frå Hermansverk, ti år på rad deltok på 26 årlege julebord. På det meste var han med på tre julebord på ein dag. Dette heldt på å ta fullstendig knekken på mannen som rekna seg som ein grossist i tillitsverv. Etter å ha fått stadfesta både diabetes og ekstrem overvekt, tok Gjerde grep og gjekk ned 40 kilo.

2. Betongbil reiv ned høgspent

Uhellet på riksveg 15 i Vågsøy tronar øvst på lista. Mange sperra opp ago då dei såg ein betongbil kome køyrande med kranen høgt heva. Det kunne ikkje gå bra på ei strekkje med høgspentlina hengande over vegbana.

Ved Tennebø tok kranen med seg høgspentlina og mørkla nær heile kommunen. I ettertid refsa lensmann Tormod Hvattum trafikantar for å ta bilete, framfor å stogge den farefulle ferda.

– Her har sjåføren gjort ein tabbe, og alle måtte forstå at ikkje alt var som det skulle her. Ergo burde dei som møtte bilen ha prøvd å stanse han, sa Hvattum.

Føraren av betongbilen fekk 7.000 kroner i bot etter uhellet.

3. Kledde av seg – enda i avisa

Impulshandlinga til Paul Lockhart og kjærasten i mai vakte nasjonal merksemd. På veg gjennom Våtedalen mellom Gloppen og Jølster stogga paret for å ta nakenbilete.

Det dei ikkje visste var at journalist Hallstein Dvergsdal i Firda Tidend også var på veg. Då han stogga for å ta ein telefon, foreviga han like godt seansen og trykte bileta i avisa.

– Vi syntest det var artig å sjå oss sjølve på nettet. Vi hadde jo aldri planlagt biletet, men hadde det berre moro. Det speglar nok oss som personar på ein eller annan måte, sa Lockhart til NRK.no i etterkant.

4. – Det må vere tidenes jobbsøknad

Kafévert Gry Leite på Værlandet fekk ei latterkule av dei sjeldne då ho fekk Marius Gjøstein sin søknad om sommarjobb på bordet. Den humoristiske søknaden gjekk rett heim hos Leite, men også hos NRK sine lesarar som delte saka over 4.700 gonger på Facebook.

Eigedomsmeklarstudenten viste mellom anna til at han kan både pluss og minus, litt flytande norsk og berre har fem tommeltottar. Utrusta med «anleggsmaskinførar sertifisering» ville ikkje ryddearbeid by mot problem – på dagar i medvind.

– Eg rekna det ikkje som noko kjempefare å prøve med humor, men må jo seie at det har teke litt meir av enn eg tenkte. Eg hadde aldri rekna med så mykje oppstyr, gliste 26-åringen i etterkant.

5. Verdas første flytebryggje for cruiseskip

Verdas første flytebryggje, Seawalk-kaia, trefte sjøen i Skjolden då cruiseskipet Queen Elisabeth vitja bygda i august. Konseptet vart utvikla av Høyanger-selskapet Østerbø Maskin, men såg dagens lys etter at Cruise Ventures på Veitastrond kjøpte og tok det vidare.

• LES OGSÅ: Fryktar cruisekai skader fisken

Den mobile flytebryggja har fått stor internasjonal merksemd, og har kapasitet til å tømme eit skip med 4.000 passasjerar på ein time. Noko som kan vere godt nytt for fjorddestinasjonar som opplever kraftig auke i cruiseanløp.

– Dette er ein løysing som er veldig miljøvenleg, den er lite plasskrevjande, og fleksibel i forhold til anløpa. I tillegg er kostnaden ved ei slik kai vesentleg lågare enn ei fast kai, sa styreleiar Ole Heggheim.

6. Fekk kveite på 2.20 meter og 150 kg

Det var ikkje noko rekordkveite Jon Arne Stokke (63) drog opp frå Gloppefjorden i august, men likevel eit beist få har sett maken til. For fisken som fall for freistinga å glefse i seg silda Stokke festa på lina, målte ikkje mindre enn over to meter og 150 kilo.

Historia om kjempefangsten gjekk landet rundt, men trass stor mediepågang fekk han tid til å filetere kveita.

– Eg har ikkje fryseplass til alt, så eg håpar at folk vil ha, fortalde Stokke til NRK.no dagen deretter.

7. Folk fauk veggimellom

Passasjerane klamra seg fast då tre svære bølgjer trefte hurtigruta «Kong Harald» på vêrutsette Stadhavet på veg nordover 19. januar i år.

Båten la seg langflat over på sida og folk, bord, stolar og andre ting vart kasta kring om. Til alt hell vart ingen alvorleg skadde i hendinga.

• SJÅ: Biletgalleri frå dramatikken

– På Stadhavet kan så mangt skje, men det var ikkje noko spesielt grov sjø i dag. Men av og til får vi slike bølgjer som er betydeleg større enn dei andre, sa kaptein Tom Rune Einarsen.

8. Sikre på at dei såg sjøorm

Ein har lenge snakka om sjøorm i Hornindalsvatnet, og i august var Arvid Otterdal, Andreas Solvik og Finn Nyhammer sikre i si sak; dei fekk den på bilete.

Bileta viser to buer i vassoverflata på europas djupaste innsjø, og vart omtala i fleire media. Trioen avviste at dei hadde koka saman ei røvarhistorie og manipulert bileta.

• LES OGSÅ: Meiner ein bør utnytte sjøormen

– Vi har sett det vi har sett, det er ikkje tvil om, sa Solvik. Zoolog Peter Bøckman var derimot sikker på at det ikkje var ein sjøorm.

– Stort sett meiner ein at sjøormar er ei form for slangar, krypdyr eller kanskje ein slags kjempefisk. Og alle desse dyra buktar seg sidelengs. Det er ingen som hevar deler av kroppen opp over vatnet slik vi ser på biletet, sa han.

9. Måtte sjølve fire seg ned frå korg

SFE-montørane Kristoffer Espelund (18) og Kåre Olav Farstad (31) fekk i kald, våt og luftig overnatting i september. 100 meter over Nordfjorden måtte dei to dele ei lita arbeidskorg då ein teknisk feil gjorde at korga ikkje ville inn att til land etter eit rutineoppdrag.

Helikopter gjorde fleire forsøk på å berge dei to mennene, men enda på visa vart at dei to måtte fire seg sjølve ned til ein ventande båt på fjorden.

– Det var surt og kaldt, og bles mykje. Også på natta bles det mykje, fortalde Farstad.

(Artikkelen held fram under videoen)

10. Tømde septiktank ved turistattraksjon

Rett nedanfor den kjende turistattraksjonen Bøyabreen i Fjærland, stilte slambilen seg opp og byrja å tømme tanken. Sjokkerte augevitne fortalde at lukta av kloakk hang over området.

Entreprenør Gunnar Følid vedgjekk at det var han som tømde slambilen, men hevdar det berre var reint vatn på tanken.

Sogndal kommune melde seinare entreprenøren til politiet for brot på forureiningslova. Saka er førebels ikkje avgjort.

Fleire saker på «klikklista»:

• 11. No er det snø på alle fjella
• 12. Isen laga lakseakvarium
• 13. Rift om farlege hus på billegsal
• 14. Skulle ta salto frå 18 meters høgde – Marius (18) er glad han er i live
• 15. Emilia har rørt heile Norge – gjer alt for si kreftsjuke søster
• 16. Her har mennene overnatta i ei lita arbeidskorg 100 meter over fjorden
• 17. Lærdalstunnelen stengd etter dødsulukke
• 18. Åtvarar mot ustabil mann – politiet har væpna seg
• 19. Plenen gjekk i lufta då varmeanlegget gav etter for stort trykk
• 20. Hossein har 22 born – vil hente 11 og ei kone til Norge
• 21. Snøen har kome på Sognefjellet
• 22. «Naking» i naturen er den nye trenden blant ungdom
• 23. Skattevesenet meiner det gamle vraket hans er verdt 65.000 kroner
• 24. Fryktar at Christina skal døy
• 25. Skulle gå 50 meter på line 70 meter over juvet, så ramla han ned
• 26. 1000 år gamal runestein øydelagd av snørydding
• 27. – Ikkje ha belte utanpå vinterjakka
• 28. Illsinte turistar aksjonerte i Flåm
• 29. Omkom i trafikkulukke i Thailand
• 30. Ambulanse brasa 30 meter utfor veg