Lensmann refsar folk for å ta bilete framfor å gripe inn i situasjonen

– Dette kunne gått skikkeleg gale. Det kunne ha fått katastrofale følgjer, seier Tormod Hvattum til Fjordenes Tidende.

Hvattum er lensmann i Vågsøy, og meiner folk reagerte uansvarleg då ein betongpumpebil kom køyrande med pumpearmen rett til vêrs.

Onsdag kveld var det nemleg fleire som fekk hakeslepp då dei såg bilen komme køyrande med pumpearmen ragande mange meter opp i lufta.

Armen drog til slutt med seg ei høgspentline ved Tennebø, og drog denne med seg ned i vegbana.

Biletet og saka med bilen gjekk landet rundt på mange nettaviser.

• LES OGSÅ: Slik kom betongbilen køyrande før den reiv ned høgspentlina

– Her har sjåføren gjort ein tabbe, og alle måtte forstå at ikkje alt var som det skulle her. Ergo burde dei som møtte bilen ha prøvd å stanse han, seier Hvattum til Fjordenes Tidende.

– Dei burde sjølve ha stansa og prøvd å signalisert til betongbilsjåføren, seier han til avisa.