Dette skal ha skjedd i august i år ved ein utestad i Kristiansund sentrum. Den dømde slo ein annan med balltre fleire gonger i hovudet og i venstre arm. Begge var påverka av alkohol.
I dommen går det fram at den fornærma blei køyrt med ambulanse til Kristiansund sjukehus for å blant anna sy eit kutt bak øyret.
Syns fornærma var plagsam
Dei to mennene hadde seint på kvelden ein diskusjon utanfor utestaden, og den dømde fortalde i retten at han hadde blitt irritert.
Mannen budde i same bygget som utestaden, og hadde difor kort veg til å hente balltreet, som han brukte til å slå den andre mannen med. Det står også i dommen at dei to mennene har gitt ulike forklaringar om graden av vald.
Halvt år i fengsel
Straffenivået for vald har blitt heva dei siste åra, og nordmøringen er difor dømd til seks månader i fengsel, og til å betale sakskostnadane på 3000 kroner.
Han er tidlegare straffa for vald og narkotikakriminalitet.
