Spesialsjukepleiarane i Møre og Romsdal er dei eldste i landet. Ein fersk rapport frå Norsk Sykepleierforbund viser at gjennomsnittsalderen er på 49 år.
På operasjonsavdelinga ved Ålesund sjukehus vil så mange som éin tredjedel av spesialsjukepleiarane gå av i pensjon i løpet av to år.
– Vi har berre 10 tilsette som er under 50 år og det er urovekkande. Det er skrikande behov over heile landet, så det er ikkje så mange å hente inn heller, seier seksjonsleiar for operasjon, Annbjørg Flisnes.
Seksjonen for anestesi i Ålesund har over lengre tid utlyst to stillingar utan søkarar.
– No er vi avhengige av å rekruttere frå eigne rekker, slik at studentane vil bli i Ålesund etter endt utdanning, seier ass.seksjonsleiar ved anestesi, Bergit Vassbø.
Etterlengta tiltak
Universitetet i Ålesund har utdanna spesialsjukepleiarar på karaktergrunnlag frå heile landet. Desse har returnert til sine byar, medan få har søkt jobb i Ålesund etter avsluttande praksisperiode.
No har helseføretaket avsett 10 millionar kroner i år, og 16 millionar dei to neste åra for å imøtekome det veksande problemet.
– På landsbasis dekker dei fleste helseføretaka denne type utdanning, men i Møre og Romsdal vart den valt vekk. Det var på tide at dei no sett av midlar, for dette har blitt eit stort problem, seier fylkesleiar i Sjukepleiarforbundet, Kaspara Nesseth Tørlen.
Pengane skal nyttast til å vidareutdanne sjukepleiarar ved fylket sine fire sjukehus.
Dette er vel ikkje nok til å løyse problemet?
– Det er langt ifrå nok til å dekke mangelen på kompetanse som vil kome i same periode. Dei må truleg halde fram med dette kontinuerleg i mange år, og heller få ein buffer enn å vere i bakkant, seier Charles Austnes, ansattrepresentant i Sjukepleiarforbundet.
Må tenke seniorpolitikk
Pensjonsalder for sjukepleiarar er 65 år, men éin av tre seier at dei vil gå av med pensjon allereie ved 62 år.
– Vi må kome med tiltak slik at folk vil jobbe lenger. Det er ein hektisk jobb, så vi ser etter moglegheiter for å trappe ned på tempoet dei siste arbeidsåra, seier Arill Hevrøy.
Seniorane sit på mykje kompetanse som ein nyutdanna ikkje kan erstatte umiddelbart. Sjukehuset i Ålesund har ikkje råd til å miste fleire tilsette no.
– Konsekvensen vert at ein må redusere tilbodet, for ein kan ikkje gå på akkord med kvaliteten. Til no har vi sloppe det, nettopp fordi folk har valt å gå lenger enn til 62 år, seier Flisnes.
Anestesisjukepleiar, Bergit Vassbø er blant dei eldste på jobben.
– Eg trivast veldig godt og vil halde fram så lenge helsa er god.