– Me håpa på at folk skulle oppdage sykkelstativet og bruke anledninga til å parkere syklane sine der, seier Mirza Begic
Han er fagleiar for trafikk og miljø i Ålesund kommune, og er den som har stått for avtalen om å låne stativet gratis av Euroskilt.
– Ein bil tar opp til 10–15 sykkelplassar, og me har plassert sykkelstativet på ein parkeringsplass for å vise akkurat det, seier Begic.
Går på omgang
Sykkelstativa har blitt sett ut i fleire byar i Noreg, og salskonsulent Njål Nesvik i Euroskilt seier stativa hovudsakleg har blitt plassert i sykkelbyar.
– I utgangspunktet skulle stativa sette fokus på sykling, og stativet i Ålesund blir køyrt rundt til fleire kommunar. No skal skiltet farte litt rundt i Møre og Romsdal, men det er ikkje avklart kvar det skal, seier Nesvik.
Ålesund kommune har fått låne stativet frå byrjinga av juli til og i om lag ein månad, og det har stått på ein parkeringsplass i Kipervikgata i Ålesund sentrum.
– No har me fått vise publikum kva me kan få til etter at me får opna Aksla parkering. Då har me mogelegheit til å ta vekk enkelte parkeringsplassar i byen, og då er neste spørsmål korleis me kan nytte denne plassen, seier Begic.
– Ein mogelegheit er sykkelparkering, seier han.
Trur få syklar
Mirza Begic seier dei har diskutert kva som kan vera årsaka til at ikkje fleire har brukt stativet.
– Me lurer på om folk ikkje har forstått at det er sykkelparkering, eller om det er få som syklar til byen om sommaren, seier han.
– På ei anna side regnar det mykje her, så kanskje det kan hjelpe å ha sykkelparkering under tak i staden, seier Begic.
– Me har fått tips om at ungar brukar stativet som klatrestativ, og stativet er rett ved ein bilveg. Har de tenkt på det?
– Det har me. Hastigheita der er 30 kilometer i timen, og bilistane køyrer sakte der, seier han.
– Må få folk til å sykle
Dersom andre byar har hatt suksess med stativet så seier Begic at det kan vera gode grunnar til det.
– I til dømes i Drammen, i Kristiansand, og i Oslo er det større byar med fleire folk. Det er flate byar, og kanskje det er meir tradisjon for å sykle der, seier Begic.
– Kva skal de gjere for å gjere Ålesund til ein sykkelby?
– Først må ein regulere fleire sykkelvegar, og gjere det lett for dei som vil sykle. Me få flest mogeleg til å sykle, og no har me ikkje gode nok sykkelvegar, seier Begic.