Knut Støbakk har vore ein røystesankar for KrF og løfta partiet til å bli det klart største i Giske.
I 2007 var Giske den kommunen i landet der KrF hadde størst oppslutning, men om to år seier Støbakk takk for seg for å gje plass til ungdommen.
– Nei, altså, no synast eg det er nok. No må vi få fram nye, yngre krefter i partiet og gje dei ein sjanse. Eg vil ikkje stå i vegen for ungdommen.
Tre periodar som ordførar
Støbakk legg heller ikkje skjul på at tre periodar som ordførar fører med seg slitasje.
– Ja, eg er ikkje så veldig ung lenger, så eg byrjar å merke at dette tek på, ja. Det har sjølvsagt vore slitasje etter tre periodar som ordførar.
Når han ser tilbake på tida som ordførar i Giske, har det å treffe mykje folk vore det kjekkaste av alt.
– Det beste er å ha vore i kontakt med veldig mange hyggjelege folk, seier ordførarveteranen.
Les også:
– Det verste har vore å kutte tilboda til dei du veit treng det
Men, jobben som ordførar har også ført med seg negative opplevingar.
– Det verste er vel eigentleg når du må kutte tilbod til dei du faktisk veit treng det.
Det har ikkje vore berre enkelt å vere ordførar i Giske kommune, og mange saker har det vore ein del bråk rundt.
– Ja, det skal berre mangle at eg har opplevd litt bråk etter 12 år som ordførar. Om det ikkje hadde vore bråk, hadde du ikkje gjort jobben din. Det er i alle fall heilt sikkert.
Les også:
– Vil ikkje gå att som ein sjuande far
No håper Støbakk, som langt på veg har sikra den sterke KrF-oppslutninga i øykommunen, at det ikkje blir tøft for KrF å halde fram etter ein som har trekt såpass mange røyster som han faktisk har gjort.
– Eg håper KrF klarer å vere sterke i Giske framover, for vi har veldig mange dyktige unge politikarar som kan overta.
– Kva skal du gjere etterpå?
– Eg har tenkt å halde fram med å arbeide, men eg skal ikkje gå att som ein sjuande far i huset i KrF i Giske.