Det første YouTube-orkestret såg dagens lys i april i fjor. Kven som helst kunne delta ved å laste opp ein video av seg sjølv, og YouTubes brukarar stod for den endelege kåringa av dei 96 musikarane som fekk vere med.
Kinesisk internettsymfoni
Orkesterets første konsert fann stad i Carnegie Hall i New York. Første gongen YouTube inviterte til audition, var det med «Internet Symphony» av den berømte kinesiske komponisten Tan Dun.
Her kan du sjå Tan Duns «Internet Symphony», med klipp frå YouTubes audition:
Improviserer til nykomponert musikk
Denne gongen har arrangørane invitert den unge amerikanaren Mason Bates til å lage musikken. Hans stykke «Mothership» blir spelt av London Symfoniorkester på invitasjonsvideoen.
I tillegg til vanleg audition for orkesterstemmene, kan søkjarane konkurrere om å vere solist på konserten – dei kan legge inn sine eigne improvisasjonar to stader i «Mothership». Dei to beste improvisasjonane som blir sendt inn, skal etter planen vere solistar på konserten i Sydney, medan nr. 3 og 4 blir spelt av på storskjerm.
Alle instrument kan brukast
Det er ingen restrikasjonar på kva slags instrument som kan brukast i improvisasjonen, i invitasjonen står det at alt frå erhu til vinglas blir godteke, og at ein eventuelt kan synge eller rappe.
Arrangøren er dessutan ute etter mangfald og kreativitet, noko denne søkjaren ser ut til å ha satsa på:
Renommerte støttespelarar
YouTubes symfoniorkester blir omtalt som eit amatørorkester, men fekk like fullt ei god mottaking av mellom andre New York Times etter debutkonserten i Carnegie Hall.
Dirigent både då og no er Michael Tilson Thomas, som er sjefdirigent for San Fransisco Symfoniorkester og tilhøyrer elitedivisjonen av internasjonale dirigentar.
Her kan du sjå Michael Tilson Thomas dirigere London Symfoniorkester, som spelar Mason Bates' «Mothership»: