Eai dáidde gullan su nu olu sárdnideamen Sámis, olgoriikkas son gal johtá ja gilvá Ipmilsáni. Sárdnemátkiin duhtada son iežas mánnávuođanieguid, go dalle beassá sárdnidit olmmošálbmogiidda, nu muitala kárášjohkalaš Runar Balto.
Bajásšaddan meahcebealde
Runar Balto lea bajásšaddan Iškorasjogas Kárášjoga gielddas. Son lea Jovsset Ovllá Máreha ja Baltto Jon Biehttára váhkar ja nuoramus bárdni.
Runar Baltto dovdat maid tevdnejeaddjin, go son maid tevdne aviissaide Sápmi govvaráidui, ja iežas muitala maid leat buorideaddjin.
Dan go son maiddái lea šaddan sárdnideaddjin ii leat nu imaš, go son lea bajásšaddan kristtalaš ruovttus, ja su lagamus sogas leat leamaš earátge sárdnideaddjin.
Ii gullo sámi guovlluin sárdnideamen
Iežas ii loga leat olus sárdnidan sámi guovlluin, ja dalle go dan lea dáhkan, de eai leamaš nu ollu guldaleaddjit. Danne ohcala guovlluide gos diehta ahte čoagganit ollugat su gullat.
Iežas siste son dovdá gosa galgá vuolgit sárdnidit Ipmil sánis. Dávjá lea su sárdnemátkit mannan guhkás olgoriikii, ja doppe gal bohtet ollugat gullat sárdnideaddjiid.
Son lea leamaš sárdnemátkiin olu guovlluin máilmmis, nugo Afrihkkás ja Indias.
