– Eg trur eit møte med president Xi vil vere viktig for begge land, og for tryggleiken i verda, sa Zelenskyj.
Kina presenterte fredag ein tolvpunktsplan for ein fredsavtale mellom Ukraina og Russland. Landet håpar å spele «ei konstruktiv rolle» for å få slutt på krigen.
I planen oppfordrar Kina til våpenkvile mellom Russland og Ukraina. Dei peikar på at dialog og forhandlingar er den einaste levelege vegen ut av konflikten i Ukraina.
– At Kina snakkar om Ukraina, er bra, men det er fleire uklare punkt i forslaget, sa Zelenskyj. Han sa at han ser på utspelet meir som «tankar» enn ein konkret plan.
For Ukraina er respekten for folkeretten og territoriell integritet viktig, sa han.
Fleire fredsinitiativ
Forslaget frå Kina blei også kommentert i Russland fredag.
– Vi set pris på ønsket som dei kinesiske vennene våre har om å løyse konflikten i Ukraina på ein fredeleg måte, sa Maria Zakharaova, som er talsperson for det russiske utanriksdepartementet.
Ho la til at planen må leggje til grunn «dei nye territorielle realitetane» i Ukraina.
Den russiske presidenten, Vladimir Putin snakka fredag med presidenten i Tyrkia, Recep Tayyip Erdogan. I samtalen oppfordra Erdogan til «ein rettferdig fred».
Det har også komme andre fredsinitiativ i løpet av eittårsdagen.
Avisa Wall Street Journal skriv at Tyskland, Frankrike og Storbritannia samarbeider om eit forsøk på å få i stand forhandlingar mellom Ukraina og Russland. Det er tenestemenn frå dei tre landa som opplyser dette til avisa.
Leiarar både frå Frankrike og Tyskland skal ha oppfordra Zelenskyj til å vurdere fredssamtalar.
Zelenskyj har tidlegare avvist å forhandle med Putin.
– Sikker på å vinne
På pressekonferansen i Kyiv sa Zelenskyj at han er takksam for den innsatsen som president Erdogan har gjort for Ukraina, blant anna når det gjeld spørsmålet om eksport av korn. Tyrkia spelte ei sentral rolle i arbeidet med å forhandle fram kornavtalen i fjor.
Zelenskyj fekk også spørsmål om utsiktene til å vinne krigen.
– Eg er sikker på at vi vil vinne, og eg håpar det skjer dette året. Dersom alle partnarane våre gjer det dei har lova, er dette mogeleg, sa han.
Dialog med Afrika og Latin-Amerika
Zelenskyj sa også at han ønskjer å styrkje forholdet til afrikanske og latinamerikanske land, og at han håpar på sterkare støtte frå desse landa.
På spørsmål om kva som har vore det verste han har opplevd under krigen det siste året, svarte Zelenskyj:
– Massedrapa i Kyiv-forstaden Butsja.