– Pressefridomen er sterkt hemma og sterkt truga i heile Midtausten, seier Frode Rekve, ansvarleg for Frie medium-prosjektet ved Institutt for Journalistikk i Fredrikstad, til NRK.
Rekve deltok førre veke på ein stor, internasjonal konferanse om ytringsfridom i regi av den statlege komiteen for menneskerettar i Qatar, der kanalen al-Jazeera har sitt hovudsete.
Å stenge kanalen var eit av 13 krav Qatar nyleg fekk frå Saudi-Arabia, Dei sameinte arabiske emirat, Egypt og Bahrain etter at desse landa kutta all kontakt med landet i starten av juni, etter skuldingar om at Qatar støttar terrorisme.
- Les også:
- Les også:
Trudde den arabiske våren skulle føre til friare medium
For Rekve og dei andre frammøtte er kravet frå Saudi-Arabia og deira allierte uhøyrt, og dei møtte også opp i redaksjonen til kanalen for å vise sin støtte.
Han understrekar kor viktig kanalen er og har vore.
– I regionen er al-Jazeeras stemme svært viktig. Då den kom på arabisk midt på 90-talet var det ein sensasjon. For første gong hadde ein arabisk nyheitsredaksjon uavhengig dekning av det som skjedde i regionen, særleg fram mot og under den arabiske våren i 2011.
Ein periode prega av håp for media i regionen.
– Mange trudde at med den arabiske våren skulle vi nærmast få eit frislepp av frie medium. Folk gjekk rundt i gatene og ropte «Vi vil ha sanninga», og dermed begynte fleire medium å følge opp det kravet frå folket. Men det blei slege kraftig tilbake, seier han, og nemner blant anna Egypt.
- Les også:
- Les også:
Også Netanyahu trugar med å stenge al-Jazeera
– al-Jazeera er ingen perfekt tv-kanal. det er det vel ingen kanalar som er, heller ikkje NRK, men den har bydd på kvalitetsjournalistikk rundt det som skjer i Midtausten. Det ville vere ein forferdeleg brot på menneskerettane og ytringsfridommen om den blir stengd, seier Rekve.
Men trass trugselen frå Saudi-Arabia og deira allierte, trur han likevel ikkje at dette vil skje. Han trur at samlinga i Doha har sende eit kraftig signal.
I tillegg har Saudi-Arabia etter kvart moderert krava, og Saudi-Arabias FN-ambassadør har sagt at det ikkje er sikkert at al-Jazeera må stengast, så lenge Qatar forpliktar seg til å overvinne terrorisme.
Men det er ikkje berre frå Saudi-Arabia al-Jazeera møter press; Førre veke skreiv Israels statsminister Benjamin Netanyahu i eit Facebook-innlegg at han vil be dei lovgivande styresmaktene om å stenge al-Jazeeras kontor i Jerusalem fordi han meiner dei maner til vald rundt Tempelhøgda.
- Les også: