Tillitsvald bekymra for fagmiljøet etter møte om NH90-tilsette

Luftforsvaret si leiing forsikrar om at alle tilsette på Bardufoss som har jobba med helikoptertypen NH90 framleis har jobb i Forsvaret.

Usikkerheita har vore stor etter at regjeringa tidlegare i sommar sa opp heile avtalen med helikopterfabrikken.

I dag hadde leiinga møte med dei tilsette.

Der kom det fram at Forsvaret ser på mogelegheiter til å flytte dei tilsette til andre helikopterbasar i landet, eller mellombels til utlandet.

– Vi ser på mogelegheiter både på Bardufoss, og breiare i Luftforsvaret på kor vi kan vidareføre kompetansen. Vi har også begynt dialog med allierte om det kan vere mogelegheit for at folk med maritim kompetanse kan jobbe der ein periode før dei kjem tilbake, seier Øivind Gunnerud.

Han er stabssjef og nestkommanderande i Luftforsvaret

– Spreiar kompetanse for alle vindar

Ragnhild Berglund-Henriksen er flyteknikar på NH90 og tillitsvald for dei sivile.

Ho rekna med at moglegheita for å flytte og jobbe ein annan stad i landet ville komme opp på møte. Henriksen er likevel bekymra for fagmiljøet på helikopterbasen.

– Vi er eit lite miljø med mykje kompetanse som blir spreidd for alle vinder, og det kjenner vi på, seier Berglund-Henriksen.

Sjølv om dei tilsette held seg i ro og ventar på vidare avklaring, tenker mange på kva dei skal gjere no.

– Klart det kjem ei usikkerheit når du får beskjed om at det du jobbar med ikkje skal eksistere lengre. Mange snur seg og lurer på: Kva skjer no og kva skal vi gjere med det?

Ifølge Berglund-Henriksen kjenner dei tilsette seg likevel varetatt og set pris på at Forsvaret jobbar med kva som skal skje med dei.

– Vi tenker at Luftforsvaret kjem med det dei kan komme med, og vi gjer det vi kan gjere her for å vareta dei som er på golvet.

Kritisk til forslaget

– Eg trur ikkje det er ei god løysing å flytte kompetansen innanfor Noreg fordi det vil undergrave kompetansemiljøet på Bardufoss, seier ordførar i Målselv kommune, Bengt Magne Luneng.

Han er kritisk til forslaget til Luftforsvaret om å flytte tilsette til andre flyplassar.

Ifølge han er det eit lite, men viktig og godt miljø på helikopterbasen Lueng er bekymra for at kompetanse forsvinn, også frå Forsvaret dersom personell ikkje ønsker å flytte.

– Å miste personell vil i større eller mindre grad vere svært alvorleg for framtida til Bardufoss flyplass.

Helikoptera har lenge gitt Forsvaret hovudpine.

Helikoptera til 5 milliardar kroner blei bestilt for 20 år sidan, men framleis er ikkje alle helikoptera på plass.

Ikkje er berre tidsfristar brotne. Riksrevisjonen har konkludert med at helikoptera gir færre flytimar enn venta, har høgt vedlikehaldsbehov og store driftskostnadar.