Har fått nok av sin eigen kommune: Øy har søkt flytting til gjeldskommune

– Vi har hatt nok is i magen. Vi har sett kommunedirektørar og ordførarar komme og gå. Det har ikkje ført med seg noko endring, seier Ida Wiman Jektvik.

Ho er medlem av bygdevekstkomiteen på Rolvsøya, heilt ytst i havgapet i Vest-Finnmark. Folk på øya er så misnøgd med tilbodet til Måsøy kommune at dei no har sendt søknad til statsforvaltaren om å bli ein del av Hammerfest, skriv Hammerfestingen.

Tidlegare i år samla dei inn 62 underskrifter på øya.

Kommunane Måsøy og Hammerfest har fått frist av Statsforvaltaren til å gi ein tilbakemelding om kravet frå Rolvsøya innan 1. desember.

Om ein av kommunane seier nei så går saka vidare til Kommunal- og distriktsdepartementet for vurdering.

Jektvik fortel at problematikken har vart i årevis.

Har ikkje trua på nytt parti

I haust overtok Bygdelista styringa i Måsøy kommune, der Arbeidarpartiet har dominert i årevis. Men Jektvik har ikkje trua på betring med det nye protestpartiet.

Undervegs i prosessen med å melde overgang frå Måsøy, har Hammerfest hamna i økonomisk trøbbel.

Heller ikkje det har fått folk på Rolvsøya til å revurdere kravet om overgang.

– Vi tenkjer jo at det er ikkje noko bra at Hammerfest slit sånn som dei gjer no, men vi vurderer det sånn at vi har ingenting å tape. Fordi vi har ikkje fått det vi burde fått av vanlege kommunale tenester og oppfølging frå Måsøy kommune.

Ho forklarer at dei i dag bruker mange kommunale tenester i Hammerfest og dermed ønskjer å komme nærare byen. Ved å bli ein del av Hammerfest vil Måsøy tape innbyggjarar og inntekt.

– Vi har eit veldig stort fiskebruk som er Måsøy kommunes største arbeidsplass. Det vil jo føre med seg ein del økonomiske kutt, seier Jektvik.

Nedsliten skule

Problema som dei har i dag er ein nedsliten lærarbustad, skule og mangel på drikkevatn.

– Det vart vedteke å lukke avvik på skulen før sommaren. Det har ikkje vorte gjort noko. No er det snart jul.

I lærarbustaden er det målt 11 grader på vinterstid.

– Det er dårleg inneklima og det er ikkje reint drikkevatn. Dei må bere drikkevatn inn i huset. Dei har ikkje klart å halde varmen der ein gong.

Det er mykje utskifting av lærarar, som igjen er eit distriktsproblem, meiner Jektvik.

– Vi meiner at Måsøy kommune ikkje har gjort det dei burde gjere for å halde på dei lærarane som vi har fått. Vi har fått kjempegode lærarar på Gunnarnes dei to siste åra no, men vi har ikkje klart å halde på dei.

– Trist

Varaordførar frå Bygdelista i Måsøy, Serine Larsen, seier at dei synest det er trist at Rolvsøya har lyst til å bli ein del av Hammerfest kommune.

– Det er mange utfordringar som er ute på Rolvsøya, men Måsøy kommune jobbar flittig for å gjere det betre for befolkninga der ute, så dei kan vere ein del av Måsøy, eller har lyst til å vere ein del av Måsøy kommune.

– I tida framover jobbar vi med å lukke avvik på skule, vatn og andre ting som ikkje er på plass der ute.

Ho meiner at det er viktig for kommunen og politikarane at ein held fram med å jobbe med strukturen på øya for både vaksne og barn.

Fleire år

Larsen seier at dette ikkje er ei sak som plutseleg har oppstått.

– Det er ei veldig kompleks sak, og ho har vart over fleire år.

Ho synest sjølv det er ein trasig situasjon:

– Ein kjenner jo frustrasjonen. Måsøy er ikkje ein stor kommune, og vi jobbar med å prøve å vareta alle frå alle kantar. Sånn at det skal bli mogleg å både bu og busetje seg vidare framover der ute.

Jektvik seier søknaden er send og håpar på det beste:

– Konfliktnivået er høgt og det har det vore over lang tid. Viss Hammerfest kommune seier ja, så er eg sikker på at vi har noko å bidra med.