I 2023 har kommunen eit underskot på 137 millionar kroner og det er spesielt lånerenta som blir framheva som den viktigaste årsaka til den negative utviklinga.
I 2021 betalte kommunen 21 millionar kroner i renter. Kommuneadministrasjonen anslår at denne utgiftsposten vil stige til 141 millionar kroner i 2024.
Kommunens gjeld er i dag på rundt 3,5 milliardar kroner.
Allereie til neste år blir det tøffe tak for kommunen.
Ordførar Terje Rogde (H) tok over styringa i oktober. Kommunen har i 100 år nærast utelukkande vore ein Arbeidarparti-kommune.
– Vi har heile tida sett at vi var i ei krise, seier han.
Planen framover for er å få oversikt, fortel den nybakte ordføraren.
– Det som administrasjonen har gjort er å gå gjennom alle utval, føretak og gjort store kutt for gjere endringar på drifta, seier Rogde.
Han fortel at tiltaka som vart sett i verk i september ser ut til å fungere.
– Vi kan sjå at det forbetrar seg, men vi skal ytterlegare ned for å få nullbalansen på budsjettet. Det er over heile linja vi skal gjere tiltak, som administrasjonen sjølv foreslår.
Han seier dei er godt i gang med å sjå på barnehagestrukturen, helse og omsorg, teknisk drift og kva bygningar som skal seljast.
– Det vil merkast når ein må ta ned drift, men vi skal sjå til at vi skal levere gode tenester, og lovpålagde tenester som vi er pliktige til å levere. Vi ser også at det blir nokre rokeringar og at nokre avdelingar treng meir hender og meir folk. Dette blir ei storstilt omstilling i alle sektorar.
Kritisk
Då olje- og gassnæringa kom til byen, fekk kommuneøkonomien ein solid oppsving. Eigedomsskatten frå Equinor sitt gassanlegg på Melkøya har i ein årrekkje tilført nærmare 200 millionar kroner kvart år. Pengane har vorte brukt til blant anna nytt kulturhus og nye skular.
Fredag vart det presentert ny kuttliste i Hammerfest kommune. Det blir ifølge ordføraren store kutt.
Foto: Allan Klo / NRKRogde påpeikar at det er kritisk når ein kommune med så stor inntekt kjem så skeivt ut som Hammerfest har gjort no.
– Det er farleg. Heldigvis er det trekt i snora no, og vi bremsar opp produksjonen for å gjere dei tiltaka vi skal gjere. Inntrykket mitt er at administrasjonen har lytta og komme med gode forslag framover, seier han.
Rogde fortel at innbyggjarane i kommunen kjem til å merke at ein sparer på økonomien.
– 2024 blir eit år der vi skal ta kostnadsbiletet raskt ned.
Det er kalla inn til eit ekstraordinært formannskapsmøte for å finne løysingar og sleppe at det er tre veker mellom kvart møte.
Rogde fortel at dei skal skjerme utsette personar, utsette område i kommunen og ha dei beste løysingane.
Skal snu kvar stein
Kommunedirektør Elisabeth Paulsen fortel at det neste året blir veldig stramt for kommunen.
Kommunedirektør i Hammerfest kommune, Elisabeth Paulsen, fortel at det ikkje er nokon marginar i 2024.
Foto: Allan Klo / NRK– Det er ingen marginar der. Vi gjer det med tett kostnadskontroll, innkjøps- og reiseavgrensingar og tilsetjingsstoppar. Det er heilt nødvendig i forhold til at vi skal kunne skape oss noko handlingsrom undervegs i det vi gjer av omstillingsarbeid, seier Paulsen.
Ordføraren seier dei har gode folk med seg for å knuse meir tal og gå meir i djupna på alle avdelingane.
– Vi har sett ned eit omstillingsutval som også jobbar over alle sektorane, i alle etasjane og i alt kva vi kan gjere. Kvar einaste stein skal bli snudd for å finne moglegheiter til å ta ned produksjonen, seier han.
Rogde stadfestar at dei enno må ta opp kassekreditt for å betale ut lønn til dei tilsette. Det er noko han håpar dei slepp å gjere vidare etter dei nye kutta.
– Vi er positive at dette skal gå bra, men det blir eit veldig tøft år.
