Avgjerda kjem etter at Omar Elabdellaoui testa positivt for korona. Landslagstreninga vart avlyst, og NFF har vore i dialog med Uefa og lokale smittevernstyresmakter.
NFF har diskutert saka med helsestyresmaktene og UEFA i heile dag, og kome fram til at laget skal reise til Romania og Austerrike.
Dei spelarane som kjem frå norske klubbar, blir ikkje med. Dermed slepp dei å risikere karantene etterpå.
Troppen inneheldt opprinneleg fem spelarar frå eliteserien: Sondre Rossbach (Odd), André Hansen (Rosenborg), Marius Lode (Bodø/Glimt), Patrick Berg (Bodø/Glimt) og Markus Henriksen (Rosenborg). Ingen av desse får vere med.
Laget reiser som ei gruppe i eigen buss, med eige charterfly, og bur isolert på hotellet i Romania.
– Dette er ein krevjande situasjon med mange dilemma. Vi ønskjer ikkje å utfordre unntaket vi har fått for innreisekarantene. Vi tenkjer derfor å la spelara som spelar i norske klubbar vere igjen i smittekarantene i Norge, skriv NFF i pressemeldinga dei sende ut seint i kveld.
Fotballpresident Terje Svendsen forklarer at NFF har valt denne løysinga for å hindre at det breier seg smitte i det norske samfunnet.
– Slik vi vurderer situasjonen, kan norske spelarar busett i utlandet, reise ut av landet fordi dei ikkje skal returnere til Norge, seier han.
Sportslege konsekvensar
Dei legg også vekt på dei sportslege konsekvensane av å ikkje spele kampen.
– Dei komande nasjonsliga-kampane betyr mykje sportsleg for oss. Dersom vi ikkje stiller lag, betyr det at vi taper to kampar. Det betyr ein tapt sjanse for å kvalifisere oss til VM, skriv NFF.
Dei norske spelarane er testa fire gonger sidan dei kom til Norge, og seinast fredag. Alle 33 prøvesvara som er mottatt i dag, er negative.
– Dette var vel den beste løysninga dei kunne lande på. Kampane blir spela, samstundes som spelarane og eliteserieklubbane blir verna, seier NRKs ekspert Carl-Erik Torp.
– Eg skjønar at NFF ville gjere alt for å få kampane spela, med tanke på konsekvensane ved å ikkje møte fram, og trur dette er ei bra løysing.
Omar Elabdellaoui, som er visekaptein på landslaget, har vore isolert frå resten av laget.
– Omar kjende først symptom i natt og har hovudverk, lett hoste, og dessutan kjenner seg slapp. Utover dette er han ved godt mot, opplyser NFF.
I pressemeldinga understrekar Stefan Johansen og Martin Ødegaard i kapteinsteamet at dei er uroa over den auka smittesituasjonen i samfunnet.
– Derfor gjer vi alt i kvardagen for å ikkje utsetje andre for risiko. Som fotballspelarar har vi levd i karantene i seks månader. Vi gjer det vi kan for å halde fotballen i gang. Desse kampane betyr mykje for oss, seier dei.
Vil ha nye vurderingar
Den aukande smitteutviklinga i Noreg og i Europa har gjort at fleire har stilt spørsmål ved fritaket til fotballspelarane frå karanteneavgjerdene.
Helsedirektør Bjørn Guldvog har varsla at idretten no må ta nye vurderingar av dei ulike smittevernprotokollane.
Dei siste dagane har det nemleg vore fleire smittetilfelle i både norske klubblag og andre landslag. Onsdag vart Noregs kamp mot Israel avlyst som følgje av at ein israelsk spelar testa positivt for korona.
Helsedirektøren tok sjølv initiativ og tilrådde avlysing berre timar før avspark.
Då regjeringa og helsestyresmaktene heldt pressekonferanse om koronasituasjonen tidlegare fredag, varsla statsminister Erna Solberg at regjeringa ikkje kan halde fram med å prioritere idretten uavhengig av smittesituasjonen.
Kommunikasjonsdirektør Gro Tvedt Andersen i Noregs Fotballforbund seier fredag kveld at de ikkje har noko klart svar på kva karantenen vil ha å si for 25. runde i Eliteserien og dermed gullkampen for Bodø/Glimt mot Strømsgodset.
– Vi er klare over problemstillingen. Vi kjem tilbake når vi har kommet til ein konklusjon, seier ho til NRK.
Dette har vore praksis
Noreg har så langt vore åleine om å avlyse ein landskamp. Ved andre smittetilfelle har det aktuelle landslaget stilt lag etter å ha gjort smitteverntiltak etter den positive prøva.
I oktober avla mellom anna Cristiano Ronaldo ei positiv prøve under landslagssamlinga, og Portugal testa dermed dei andre spelarane i troppen.
Då alle prøvene var negative, vart resten av troppen klarert for spel mot Sverige.
I Uefa-protokollen heiter det at viss 13 spelarar er tilgjengelege, inkludert ei målvakt, skal kampen spelast.
Norge møter Romania søndag og Austerrike onsdag i dei to siste kampane i årets nasjonsliga.