Garanterer at Carlsen-bråket blir storsatsing: – Perfekt for amerikansk film

– Det er absolutt A-laget som er inne her.

Det seier redaktør Geir Kamsvåg i Cinema etter at fleire amerikanske medium torsdag melde at sjakkfeiden mellom Magnus Carlsen og Hans Niemann skal bli film i USA.

The Hollywood Reporter er blant dei som melder om nyheita.

Ut frå kven som tilsynelatande skal vere involvert, garanterer Kamsvåg at dette er snakk om ei storsatsing i amerikansk filmbransje.

– Det er garantert ein film som vil koste fleire hundre millionar kroner å lage. Her blir det stjerner i alle roller og full pakke, seier han og meiner dette kan bli ein suksess.

Les også Vart håna av Niemann i direktesending: – Blir litt kvalm av det

Kamp om bokmanus

Det er ein av dei største skandalane til sjakken, som nokre av dei verkeleg store namna i amerikansk filmbransje nå har kasta seg over.

Historia det er snakk om er konflikten mellom Magnus Carlsen og Hans Niemann. Den starta da Carlsen tapte eit parti i Sinquefield Cup i 2022 og deretter antyda at Niemann juksa.

Da dei to møttest to veker seinare i Julius Baer Generational Cup gjennomførte Carlsen berre eitt trekk før han trekte seg frå kampen.

Like etter la han ut denne meldinga på X:

«Eg trur Niemann har juksa meir – også nyleg – enn han har innrømt offentleg».

Bråket skaka sjakkverda og saka berre voks dei neste vekene.

Det gjekk så langt at Niemann saksøkte Carlsen for ein milliard kroner.

Sjakkdramaet og etterspelet fekk enorm merksemd.

Det har gjort at det også har blitt kamp om filmrettane til bokmanuset «Checkmate» av Ben Mezrich, som handlar om bråket og veksten til sjakken til å bli ein gedigen industri.

Blant anna skal filmstjerna Emma Stone vere blant dei som nå har trekt det lengste strået. Sjølv skal Stone, som vann Oscar for beste kvinnelege hovudrolle i mars i år, vere inne som produsent i prosjektet.

– Dette kjem til å bli stort. Det er eg heilt sikker på, seier Kamsvåg.

For kort tid etter suksessen med thriller-serien «The Curse», har Stone, Nathan Fielder og produksjonsselskapet A24 igjen slått seg saman.

Ifølge The Hollywood Reporter var det fleire Hollywood-studio og strøymegigantar som viste interesse for prosjektet.

A24 skal ha lagt inn eit tosifra tal millionar for å sikre seg rettane, ifølge nettstaden. Fleire gonger tidlegare har bokmanusa til Ben Mezrich blitt til film. Mest kjent er kanskje «The Social Network», som handla om korleis Facebook blei til. Den spelte inn 224 millionar dollar i 2010.

– Seier litt om kor stor saka var

Nyheita blir omtalt som stort i sjakkmiljøet.

– Det er store Hollywood-namn som er involverte i dette prosjektet. Så det seier jo litt om kor stor denne saka var, og framleis er i USA, seier Tarjei Svensen, journalist i Chess.com.

Det er ikkje første gong sjakk kan bli ein del av TV- og filmbransjen.

Det er snart fire år sidan serien «The Queen's Gambit» kom ut. Serien er den mest sette fiksjonsbaserte miniserien på Netflix nokosinne.

Historia om barneheimsjenta som blir den beste sjakkspelaren i verda sørgd samtidig for eit oppsving i interessa for sporten.

Brått hadde Chess.com fått fleire millionar nye medlemmer. Svensen meiner Netflix-serien var viktig for auken.

– Carlsen og Niemann-saka har vore positiv for sporten, på grunn av all merksemda ho har generert, og da spesielt i USA, seier Svensen og fortset:

– Før pandemien var det rundt 10 millionar medlemmer på Chess.com. Nå er det over 170 millionar. Og eg trur potensialet er enda større, seier han.

– Perfekt

Kamsvåg meiner potensialet for sjakkfeiden er stor som film.

– Det er konflikt og ein amerikanar på den eine sida. Det er perfekt for amerikansk film og sjakk er jo stort i heile verda, seier Kamsvåg.

Han trur også at suksessen til «The Queen's Gambit» har gjort sjakk meir aktuelt for det store lerretet.

A24 er heller ikkje kva produksjonsselskap som helst i USA.

– Alle dei store klassiske Hollywood-selskapa er kjøpt opp av tech-firma. Det er det einaste store uavhengige selskapet som står på eigne føter, seier Kamsvåg.

NRK har prøvd å komme i kontakt med far og manager til Magnus Carlsen, Henrik Carlsen, og spurt om dei skal vere delaktige i regi eller produksjonen av filmen. Dei har ikkje svart på førespurnadene våre.

Les også Ni filmar og TV-seriar der sjakk spelar ei sentral rolle

Gransking og søksmål

Filmskaparane vil ha nok av dramatikk å ta tak i.

Som følge av jukseskuldingane valde Chess.com å stenge ute Niemann frå nettsida deira. Dei sette også i gang ei gransking som enda i ein rapport, der det blei hevda at Niemann hadde juksa i over 100 parti.

Niemann har på si side forsvart seg mot skuldingar om juks og etter at søksmålet hans blei avvist av domstolen i Missouri, inngjekk partane eit forlik. Det innebar blant anna at Niemanns utestenging hos Chess.com blei oppheva.

Amerikanaren har innrømt å ha juksa som 12- og 16-åring, men har heile vegen nekta for å ha juksa mot Carlsen.

Hans Niemann ramponerte hotellrom: – Kultiverer imaget sitt som sjakkens nye «bad boy»

Det internasjonale sjakkforbundet (Fide) opna sjølv ei etterforsking mot både Carlsen og Niemann.

I desember i fjor var konklusjonen til Fide klar. Magnus Carlsen blei frifunnen på tre av fire punkt.

Men Carlsen blei dømt til ei bot på 10.000 euro for å ha trekt seg frå Sinquefield Cup utan «gyldig grunn».

null

Spiller nå

Sjekk Ruuds sommerskille: – Noe av det raffeste jeg har sett 00:21

Neste

Spyler ned NRK-reporteren: – Var ikke det gøy? 02:25 Ut mot OL-sengene: Dro rett på Ikea 00:58 Iuels private bilde får lagvenninnene til å måpe 00:56

Vis flere