Kristoffersen får advokat-støtte: – Merkeleg av skiforbundet

NRK kunne onsdag avsløre at Henrik Kristoffersen går til rettssak mot Norges Skiforbund, og at forbundet kjem til å la saka gå til retten.

No reagerer idrettsjuristen Gunnar-Martin Kjenner på at skiforbundet ikkje vil prøve å løyse saka før den må avgjerast i ein rettssal.

– Er du overraska over at skiforbundet ikkje berre har gått med på kravet for å unngå ein rettssak?

– Ja, på ein måte er eg det. Eg er også overraska fordi ein allereie har ein liknande avtale med ein annan utøver innan alpint, så eg synest det er merkeleg frå skiforbundets side, seier Gunnar-Martin Kjenner til NRK.

• Les også: Skiforbundet tapar mange millionar på Kristoffersen-nekt

Prinsippsak

Men skiforbundet seier at dette handlar om prinsipp, og at skistyret på bakgrunn av dette ikkje kan sei ja til Kristoffersen i denne saka.

– For oss har dette handla om eit viktig prinsipp. Henrik har som alle våre andre landslagsutøvere moglegheit til å inngå private avtaler, men her handlar det om ein kan inngå ein avtale på eksponert flate, som skistyret sa nei til, seier skipresident Erik Røste til NRK.

Det handlar altså om kven som skal eige marknadsretten på utøvarane, og kor vidt den noverande norske landslagsmodellen kan gjelde vidare.

Ekspert på konkurranserett, Per Kristian Bryng trur skipresidenten har god grunn til å vere uroa.

– Ja, eg trur eigentleg det. Nå har de hatt den same forretningsmodellen veldig lenge, og det kan jo vere at den er moden for revisjon og at tida har sprunge frå den modellen. Så ein konsekvens av dette kan vere at de må sjå på annan måte for å finne finansiering for sin verksemd framover, og i kvart fall vurdere om det er andre modellar som er meir aktuelle inn mot konkurranseregelverket.

• Aamodt: – Forstår at han gjer det

– Må skrive om lova

På kort sikt trur jurist Kjenner at denne saka vil føre til at norske idrettsøvarar får større spelerom inn mot private sponsorar.

– Dei nære konsekvensane vil truleg vere at utøvarane får større valmoglegheiter og kan velje sponsorar i større utstrekning enn i dag, seier Kjenner til NRK.

Advokat Per Kristian Bryng trur Kristoffersen har gode sjansar til å vinne fram med saka. Viss so skulle skje, meiner han lovene bør skrivast om.

– Ein langsiktig konsekvens kan vere at idretten må endre fellesbestemmelsene i særforbundene, der dei blandar kommersielle og meir Idrettslege forhold.

Også far til Henrik Kristoffersens far og manager, Lars Kristoffersen meiner noko bør gjerast.

– Eg ønskjer ikkje å utfordre systemet, men det er for rigid. Me kan ikkje gå attende i tid, tidene forandrar seg, seier Kristiansen.