Tidlegare i dag kunne NRK avsløre at Henrik Kristoffersen saksøker Norges Skiforbund.
Det fordi Kristoffersen vil ha ein tilsvarande sponsoravtale som Aksel Lund Svindal har hatt i mange år, nemleg å få lov til å bruke Red bull som sponsor på hjelmen.
Det vil ikkje Norges Skiforbund godta.
– Det har vore ein svært grundig behandling i skistyret. Det var eit solid fleirtal i den avgjerda, so det er ikkje noko som tyder på at dei skal skifte meining, seier Stein Opsal, generalsekretær i Norges Skiforbund.
Skistyret er proppen
Medan både alpinlandslagets hovudsponsor, Telenor, og alpinkomiteen har godkjent vilkåra til Henrik Kristoffersen. Men det er altså skistyret, som tek opp saker frå alle greinene underlagt skiforbundet som har sagt stopp.
– Det som er viktig for oss, er å sjå på totaliteten. Etter avtalen til Northug blei godkjend i fjor sette med ned eit utval som skulle sjå på slike avtalar. På skitinget blei me samde om at me skulle stramme inn, og difor godtek me ikkje avtalen til Kristoffersen no, seier Opsal til NRK.
– Alpinkomiteen hadde ein forslag til avtale som Kristoffersen og Telenor kunne godkjenne, men det kunne ikkje skistyret, fortset han.
Trass det, tykkjer Opsal det er synd at Kristoffersen vel å gå til sak mot skiforbundet.
– Det er sterkt beklageleg at me får ein slik sak med ein av våre mest profilerte utøvarar, seier Opsal.
– Urettferdig
Far til Henrik Kristoffersen, Lars Kristoffersen, seier til NRK at han tykkjer det er urettferdig at sonen ikkje får inngå same type avtalar som andre landslagsutøvarar har.
- Les også: Kristoffersen vurderer å droppe renn
– Det er andre utøvarar som har det, så det er litt urettferdig. Det burde vore likt for alle, seier Lars Kristoffersen.
Medan skiforbundet på si side seier at dei bevisst har stramma inn reglane etter at liknande avtalar med til dømes Petter Northug og Aksel Lund Svindal blei inngått. Begge dei avtalane går ut i 2018.
– Slik det er i dag, har me stramma inn etter avtalane med Lund Svindal og Northug blei gjort, seier Stein Opsal til NRK.
Han meiner at slike saker handlar om meir enn kva sponsor Kristoffersen får ha på hjelmen.
– Det er ein veldig viktig sak, for det dreiar seg om kven som eig marknadsrettigheitane til utøvarane. Det er det basale for korleis ein finansierer idretten. Viss utøvarane sjølv kan disponere sine private sponsorar forsvinn grunnlaget for toppidretten.