Go juo ollugat Stuorradikkis eai dáhtoše Vuođđolága jorgaluvvot ođđa dárogillii ge, de daidá vel váddásat oažžut eanetlogu sámegiel-jorgaleapmái. Nu dovddaha Stuorradikki konstitušuvnna- ja dárkkistanlávdegotti nubbinjođiheaddji , Ovddadusbellodaga, Kenneth Svendsen. Son deaivvadii ikte Sámedikkiin. Svendsen lohppida ahte buot bellodagat vudolaččat árvvoštallet Sámedikki evttohusa go dát boahtá.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.