Vasara: – Goddináitagiid galgá duođas váldit

– Lea hui šállošahttit gullat ahte diekkár dáhpáhus lea dáhpáhuvvan ja ahte váidagat leat boahtán, áitagat leat dieđus ge dakkárat mat eai leat ba dohkálačča ge min servvodagas, dan lea dehálaš deattuhit, lohká Johan Vasara (Bb).

Vasara, guhte dáidá leat Guovdageainnu suohkana ođđa sátnejođiheaddji, ávžžuha buohkaid gulahallat ja soabalaš bargovugiid bokte ovddidit iežaset oainnuid.

Ii kommentere

Guovdageainnu lagašrádio GLR dat álggos muitalii dán ášši birra. Guovdageainnu leansmánni Klemet Klemetsen duođašta maid NRKii ahte sii leat dutkamen goddináitagiid.

Klemetsen čilge ahte politihkkár gii álggos lea váidon, lea ges váidán daid geat su váide. Boahtte vahkus dutkagohtet politiijat eambogiid dán áššis.

NRK Sápmi lea maid gulahallan politihkkárin guhte lea váidon, muhto son ii hálit kommenteret ášši.

Riidu

Klemetsen maid duođašta, ahte muhtin badjeolbmuid ja muhtin dáloniid gaskkas suohkanis ii leat dán čavčča leamaš nu buorre oktavuohta.

Riidu galgá leat čuožžilan maŋŋágo Finnmárkku filkamánni gieskat giddii bievlavuodjengeainnu, man ollugat geavahit guolle- ja rievssatbivddus.

Leansmánni ii dáhto duođi eanet čilget duogáža váidagii.

– Dárbbašit bargoráfi

Vasara ii ge hálit nu olu dadjat ášši birra. Son muittuha ahte politiijat leat dutkamen ášši ii ge okta ge galgga ovddalgihtii dubmehallot.

– Mon in hálit nu olu spekuleret das mii dán áššis sáhttá leat dáhpáhuvvan, muhto go politiijaváidda boahtá, de dan galgá duođalaččat váldit ja addit politiijaide bargoráfi gávnnahit mii lea dáhpáhuvvan, lohká Vasara.

Ávvir áviisa dieđuid mielde leat Guovdageainnu Bargiidbellodat ja Johttisápmelaččaid listu soahpan ovttasbarggu ja ceggejit eanetloguovttasbarggu Guovdageainnus.

Bealit leat soahpan ahte Bargiidbellodaga Johan Vasara šaddá ođđa sátnejođiheaddji ja Johttisápmelaččaid listu, Anders S. Buljo, ges várresátnejođiheaddji.