Kárášjoga gielddas ii leat dearvvašvuođadivššár leamaš barggus juovlamánu gaskkamuttu rájes. Erenoamážit unna mánážiid váhnemiidda čuohcá dát dilli go ii leat divššár gii čuovvu sin mánáid ovdáneami eaige boahkut ge šatta biddjot. Máŋggas leat váldán oktavuođa gielddan ja fylkkadoaktáriin, muhto ii leat mihkkege dahkkon áššis.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.