TV2 ii áiggu šat sámi TV-prográmmaid čájehit ja buvttadit. Numuitala Kampanje-neahttabáiki, mii lea lohkan TV-guvtteža ohcamuša beassat joatkit riikkaviidosaš kommersiealla TV-sáddehahkan. Mediadieđaprofessor Jostein Gripsrud ii leat hirpmástuvvan, go dadjá TV2 han dušše sáddii dan ovtta ja seamma sámi TV-prográmma oktii jahkái, vai aiddo dal de čuovui sámi sáddehatgáibádusaid. TV2 ii leat háliidan kommenteret ášši.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.