Lávvordat ija fallehuvvui Hámmarfeastta taksivuoddji Arild Herstrøm go dievdu čárvii su čoddagii.
– Mus lei oaivi nu unohasat, in ge ožžon báljo vuoiŋŋahaga. Go son lei botnjan mu vuollái, de savkalii vel ahte son lea easkka álgán. Son nihtii mus doadjit niskki, lohká Herstrøm Finnmark Dagblad aviisii.
Jus ii lean galgat fas vuodjit nuppe beaivve, de ii jáhke son livččii duostan šat goassege dán barggu joatkit.
Guovdageainnus galgá ges viđatlotjahkásaš dievdu suhttan ja ohcan ákšu mainna dearpagođii biilla siskkil. Dát dáhpáhuvai ovdalaš beassážiid.
Duođalaš
Guovdageainnu politibálvá Nina Aleksandersen duođašta ahte muhtin lea váidán viđalotjahkásaš dievddu dákkár áššis.
Son lohká sin atnit ášši duođalažžan, go galgá leat almmolaš báikkis nihtán nuppi. Politijat leat dutkan ášši, ja sádden dan Oarje-Finnmárkku politiguvlui.
– Váivi
Taksivuoddji Anders Persen Sara lea vuodján droššiin juo 35 jagi. Son gal lihkus ii leat vásihan dákkáriid barggus.
– Dat gal lea heitot ja váivi, muhto dieđusge leat gilit ja gávpogat sturron. Galggašii nu go Ruoŧa gávpogiin lea gullon, ahte lea plástet seaidni vuoddji ja eará olbmuid gaskkas, lohká Sara.