Lea vuosttaš geardde go Sven Tomas Holm (20) Sirpmás eret lea gorron gávtti, ja ná son muitala manne son háliidii gávtti goarrut:
– Mus lei skibir gii munnje goarui gávtti, ja orui nu álki ahte smihtten mun gal ieš maid nagodan dien. Mus lei miella oahppat. Ii orron gal váttis, muhto go vuos álgen, de lei hui bargu.
– Nu ahte ii lean nu álki go ledjet álggos doivon?
– Aa. Álggos gal ledje dušše njulges sávnnjit, muhto go galgen hervegoahtit, de lei hui bargu.
Ii Sven Tomas Holm duhtan dušše ovtta gáktái, son goarostii vel nuppi.
Foto: Anne Márjá Hætta/NRKGoarostii vel nuppi
Sven Tomas Holm goarui Buolbmát-gávtti, ja muitala ahte Karina Kåven dat oahpahii su.
– Lea hui buorre jearrat veahki earáin geat leat ovdal gorron. Hui álki vel jus leat minstarat. Muhto oahppanmokta lea goitge deháleamos.
Go lei gorron vuosttaš gávtti, de finai Sirpmás áhkus luhtte.
– Ledjen bivdán áhku ráhkadit minstara nuppi gáktái, go mus ii lean minsttar mii juste heivii munnje. Go ožžon minstariid mat heivejit juste munnje, de šattai miella goarrut vel nuppi gávtti.
– Maid áhkku logai dasa go ieš háliidat goarrut gávtti?
– Son ii lohkan gal nu olu, dušše «hm, hm», mojohallá Sven Tomas.
Dál ges háliida oahppat čuoldit
Vuosttaš gávtti lohká ádjánan birrasii 12 diimmu goarrut, muhto nuppi ádjánii guhkit go šattai rahtat nu olu go goarui boastut.
– Oidno ahte lean ieš gorron gávtti, muhtin sajiid dat ii leat nu čáppat, reašká Sven Tomas ja muitala ahte muhtomin gal dolkkai goarrut, muhto de jurddašii ahte áigu geargat.
– Jáhkát go ahte movttiidahtát eará bártniid goarrut gávtti?
– Juo, lea hui buorre go ieš oahppá goarrut, vaikko vel leage gánda. Jus šaddá miella ođđa gáktái, de ii leat earágo čohkkedit goarrunmašiinna duohkái.
Dál go Sven Tomas Holm lea oahppan gávtti goarrut, de lea fuomášan man somá lea duddjot. Dál háliida ges oahppat vuoddagiid čuoldit.
