Nu dadjá Bargiidbellodaga jođiheaddji, Jonas Gahr Støre, ja čujuha dasa ahte dál dát bellodagat eai nagot ovddidit stáhtabušeahta ge rivttes áigái.
– Olgešbellodaga Stáhtaministtar, Erna Solberg, han válgagiččus lohpidii buoret čađahannávcca dálá ráđđehusas, muhto dán čavčča gal su lohpádusat leat garrasit láivon ja rihkkojuvvon.
Nu dajai Bargiidbellodaga jođiheaddji, Jonas Gahr Støre go son ikte eahketbeaivve deaivvadii journalisttaiguin maŋŋilgo čielggai ahte maiddái Risttalaš Álbmotbellodat čuovvolii Gurutbellodaga ja botkii bušeahttašiehtadallamiid ráđđehusbellodagaiguin.
Áigemeriid rihkkun
Støre lohká dán čavčča bušeahttašiehtadallamiid čielga dovdomearkkat leat ollu ja guhkes čoahkkimat main áigemearit čađat leat rihkkojuvvon.
– Mun gal doaivvun ahte Olgeš ja Ovddádusbellodat nagodit soabadit Risttalaš Álbmotbellodagain ja Gurutbellodagain ovdalgo mánnodahkii joavdat, dannego Norga duođai dárbbaša ahte bušeahtta gárvvistuvvošii mánnodahkii go finánsadigaštallan galgá čađahuvvot Stuorradikkis, dadjá Støre.
Goappaš ráđđehusa doarjjabellodagat leat cealkán, ahte sii gal eai leat oalát gidden uvssaid ráđđehusbellodagaide. Stáhtaministtar Erna Solberg bealistis dajai ikte, ahte son dahká maid sáhttá vai olahit ovttamielalašvuođa doarjjabellodagaiguin.
Mohkkás geaidnu
Jonas Gahr Støre lohká ahte geaidnu ovttamielalašvuhtii lea leamaš sihke guhkki ja moalkái. Ja go sierramielalašvuohta lea bisson nu guhkás go dál lea, de dat duođašta ahte ráđđehusbellodagain váilu dáhttu mearridit digaštallamiid vuođul, dadjá Støre.
Son dadjá ahte ráđđehusbellodagain maid váilu dáhttu ja máhttu hálddašit Stuorradikki go sii leat unnitlogus, movt galget ovddidit gáibádusaid ovttasbargobellodagaide ja Stuorradiggái.
– Dálá dillii vulggii juo guokte mánu áigi, eaige ráđđehusbellodagat leat nagodan dan čili čorget, mii iešalddis lea duođalaš, dadjá Jonas Gahr Støre.