Stáhtadoarjaga skuvlaovttasbargui

Deanu sátnejođiheaddji oaivvilda stáhta fertet leat mielde ruhtadeamin ráddjaskuvllaovttasbarggu Deanus.

Frank Ingilæ, ordfører i Tana
Foto: Nils Henrik Måsø / NRK

– Skuvlaovttasbargu lea erenoamáš našunala oktavuođas go guovttelágan skuvlahálddašeami ovttasbarget, deattuha sátnejođiheaddji Frank Ingilæ.

Bivdá ruhtadeami

Lea Sirpmá ja Ohcejoga skuvllat mat ovttasbarget, beroškeahttá riikarájáid.

– Go skuvllat ná besset ovttasbargat, de jávkadit rádjahehttehusaid, nannejit sámegiela ja maiddái Deanuleagi ealli kultuvrra, deattuha sátnejođiheaddji Frank Ingilæ.

Son bivdá dál stáhta juollodit beannot miljovnna kruvnna dán ráddjaskuvlla ovttasbargui, ruhta maid son ii jáhke Deanu heajos gielddaekonomiiján sáhttit doalahit.

Sádden reivve departementti

Deanu sátnejođiheaddji Frank Ingilæ lea Máhttodepartementti sádden reivve dán ášši birra, mas bivdá árvvoštallat ruhtadeame dan erenoamáš ovttasbarggu geažil.

– Suomas han lea buorre skuvladássi, bargu maid sáhttá ráddjaskuvllain ávkkástallat, loahpaha Ingilæ.