Sofie Marhaug: – Mo sáhttá stáhtaministtar oaivvildit ahte ráđđehus lea oahppan Fovse-áššis?
– Mo sáhttá stáhtaministtar oaivvildit ahte ráđđehus lea oahppan Fovse-áššis, go stáhta Statkraft bokte pláne hukset guohtunguovlluide Davvesiiddas ja Gáŋgaviikkas, ja ráđđehus ieš lea fápmoloktema duohken mii vuorjašuhttá olbmuid?
Dan jearrá ruksesbellodaga Sofie Marhaug energiijaministaris Terje Aasland:as (Bb). Statkraft le ge pláneme bieggafápmoprošeavttaid Davvesiidii ja Gáŋgaviikii. Dát bieggafápmorusttegat, váikkuhit guovtti boazodoalloguvlui.
Davvesiida gielddastivrračoahkkin maŋidii ikte guhtta bieggafápmoášši meannudeami geassemánu gielddastivrračoahkkimii.
– NVE álgobargguid oktavuođas leat almmuhan olu ođđa jurddašuvvon fápmoprošeavttaid Finnmárkui, ja vurdojuvvo ahte NVE boahtá oažžut ain eambbo prošeavttaid meannudeapmái, mat sáhtášedje buvttadit máŋga duháha MW ođđa bieggafámu.
Dan vástida Aasland.
– Muhto sihke ráđđehus ja NVE leat hui čielgasat dasa ahte ii leat vejolaš addit nie ollu huksenlobiid, diekkár viidodagas. Ii leat sadji nie stuorra huksehusaide fápmovuogádaga dáfus iige dakkár beroštumiid vuhtiiváldima dáfus nugo luonddu, birrasa ja sámi beroštumiid, vástida Aasland.
