Nuorranieida Nrgga beale Sámis lea ožžon SMS-dieđuid soapmásis guhte čuoččuha iežas leat beakkán juoigi ja Ruoŧa taleantagilvvu vuoiti Jon Henrik Fjällgren.
Fjällgren, guhte Ruoŧas juo lea vásihan ahte earát suoládit su identitehta, rávve olbmuid leat várrugasat jus ožžot dákkár SMSaid, go son ii čále dahje sádde alddis govaid amasolbmuide soaittáhagas.
– Munnje lea váivi ja unohas go muhtumat ná vigget dájuhit nuorranieiddaid ja maid munnje dagahit váttisvuođaid, lohká Fjällgren NRK Sápmái.
Maŋŋágo šattai stuorra beakkálmassan miehtá Davveriikkaid Ruoŧa taleantagilvvu vuoittuin lea Fjällgren ožžon čiegus telefonnummira. Giinu lea almmatge su namas ráhkadan nugo Instagram geavheaddji nama.
Dássážii leat diet dáhpáhusat leamaš Ruoŧa bealde, muhto vássán basiid go Fjällgren lei Gáivuonas doallamen konseartta Riddu Riđđu festiválas, válddii amas Norgga beale nieida suinna oktavuoda daid SMS-dieđuid birra.
Fjällgren ii vel diede váidágo son dán ášši politiijaide. Son fertešii vuos eanet gulahallat nieiddain guhte lea ožžon dáid SMSaid.